Имрӯз раиси шаҳри Турсунзода Акрамзода Парвиз Акрам аз ҷараёни корҳои сохтмонии иншооти ҷашнӣ ва биноҳои баландошёна, ки дар доираи омодагиҳо ба таҷлили 35-солагии Истиқлолияти давлатии Ҷумҳурии Тоҷикистон бунёд гардида истодаанд, боздид ба амал оварданд.
Зимни боздид раиси шаҳр бо рафти корҳои сохтмонӣ, сифати корҳои анҷомдодашуда ва муҳлати иҷрои лоиҳаҳо шинос шуда, ба масъулин ҷиҳати вусъат бахшидани корҳои ободониву созандагӣ, истифодаи босамари имкониятҳо ва риояи талаботи меъмориву шаҳрсозӣ дастуру супоришҳои мушаххас доданд.
Қайд гардид, ки бунёди иншооти муосир, биноҳои баландошёнаи истиқоматӣ, марказҳои хизматрасонӣ ва дигар иншооти иҷтимоӣ дар доираи сиёсати созандаи Пешвои миллат мӯҳтарам Эмомалӣ Раҳмон ва давлату Ҳукумати мамлакат амалӣ гардида, барои беҳтар намудани шароити зиндагии сокинон ва боз ҳам зебову замонавӣ гардонидани симои шаҳр мусоидат менамояд.
Ҳамчунин таъкид карда шуд, ки корҳои сохтмонӣ бояд бо сифати баланд ва мутобиқ ба талаботи замони муосир анҷом дода шуда, ҳар як иншоот дар муҳлати муайяншуда мавриди истифода қарор дода шавад.
Бояд тазаккур дод, ки дар доираи ҷашни муқаддасу таърихӣ 35 солагии истиқлоли давлатӣ дар шаҳри Турсунзода 459 иншоот ба нақша гирифта шудааст, ки аз ин то имрӯз 438 иншоот сохта ба истифода дода шуд. Дар боқимондаи иншоот корҳо бо маром идома дорад.
Сокинони шаҳри Турсунзода аз корҳои созандагиву бунёдкорӣ истиқбол намуда, саҳми худро дар ободонии шаҳр ва истиқболи сазовори ҷашни бузурги миллӣ мегузоранд.