Хониши сиёсӣ дар мавзӯи “Заминаҳои ташаккулёбӣ ва рушди соҳаи ҳифзи сирри давлатӣ дар Ҷумҳурии Тоҷикистон”
Дар доираи нақшаи чорабиниҳои Саридораи ҳифзи сирри давлатӣ ҷиҳати сазовор ҷашн гирифтан аз 35-солагии Истиқлоли давлатӣ санаи 15 июли соли 2026 хониши сиёсӣ дар мавзӯи “Заминаҳои ташаккулёбӣ ва рушди соҳаи ҳифзи сирри давлатӣ дар Ҷумҳурии Тоҷикистон” баргузор гардид. Дар чорабинии мазкур собиқадори соҳа-собиқ муовини сардори Саридораи ҳифзи сирри давлатии назди Ҳукумати Ҷумҳурии Тоҷикистон Сафарзода Муҳаммад Бақо иштирок ва суханронӣ намуданд.
Зимни баромад номбурда қайд намуданд, ки сиёсати давлатии Ҷумҳурии Тоҷикистон дар соҳаи ҳифзи сирри давлатӣ ва ҳифзи техникии иттилоот, ҳамчун рукни муҳими сиёсати амнияти кишвар баҳри ҳимояи манфиатҳои бо қонун ҳифзшавандаи мақомоти давлатӣ ва ташкилотҳо, инчунин шаҳрвандони Ҷумҳурии Тоҷикистон басо арзишманд мебошад.
Ин самти фаъолият дар даврони Истиқлоли давлатӣ давра ба давра ташаккул ёфта, бо таҳкими заминаҳои меъёрии ҳуқуқӣ ба талаботи замони муосир мутобиқ гардонида шуда истодааст.
Дар доираи сиёсати хирадмандонаи Асосгузори сулҳу ваҳдати миллӣ – Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон Саридораи ҳифзи сирри давлатӣ фаъолиятро дар шароити идомаёбандаи ислоҳоти даврӣ самарабахш ба роҳ монда, заминаҳои аввалияи низоми ҳифзи сирри давлатиро дар мақомоти дахлдор азнавсозӣ ва санадҳои соҳавию методиро такмил дода, баҳри баланд бардоштани савияи касбии кормандони мақоми низоми махфият саҳмгузории ҷиддӣ доштанд.
Дар фарҷом аз ҷониби иштирокчиён мубодилаи афкор сурат гирифта, кормандони Саридораи ҳифзи сирри давлатӣ ба саволҳои пешниҳоднамудаашон ҷавобҳои мушаххас гирифтанд.