Баргузории семинар – машварати омӯзишӣ дар мавзӯи “Масъалаҳои ҳифзи сирри давлатӣ дар матбуот ва дигар воситаҳои ахбори омма дар Ҷумҳурии Тоҷикистон
Санаи 1 августи соли равон дар Вазорати фарҳанги Ҷумҳурии Тоҷикистон аз ҷониби кормандони Саридораи ҳифзи сирри давлатии назди Ҳукумати Ҷумҳурии Тоҷикистон семинар – машварати омӯзишӣ бо иштироки намояндагони матбуоти даврӣ ва дигар воситаҳои ахбори омма баргузор гардид.
Ҳадаф аз ташкил ва баргузории чорабинии болозикр ин омӯзиши санадҳои меъёрии ҳуқуқии соҳаи ҳифзи сирри давлатӣ, бахусус дар самти пешгирии ифшои сирри давлатӣ дар матбуот ва дигар воситаҳои ахбори омма буда, дар ҷараёни он масъалаҳои муҳими соҳа вобаста ба фаъолияти воситаҳои ахбори омма дар Ҷумҳурии Тоҷикистон мавриди баррасӣ қарор дода шуд.
Тибқи барнома аз рӯйи мавзӯҳои мубрами соҳа вобаста ба вазифа, уҳдадориҳои намояндагони матбуоти даврӣ ва воситаҳои ахбори омма дар таъмини ҳифзи боэътимоди сирри давлатӣ, мушкилоти расонидани нусхаҳои ҳатмии ройгони ҳуҷҷатҳо, таҳлили саривақтии онҳо ҳамчун воситаи муҳими пешгирии интишори маълумоти дорои сирри давлатӣ дар матбуот ва масъалаҳои воситаҳои техникии ҳифзи иттилоот шарҳу тавзеҳ дода шуда, дар раванди чорабинӣ мутахассисони соҳа ва иштирокчиён оид ба масъалаҳои болозикр табодули афкор намуданд.