Дар ҳошияи сафари давлатии Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Мардумии Чин, ки 11 майи соли 2026 оғоз гардид, аз рӯйи натиҷаҳои мулоқоту музокироти сатҳи олӣ миёни Тоҷикистон ва Чин 31 санади нави ҳамкорӣ ба имзо расид.
Санадҳои баимзорасида бахшҳои гуногуни ҳамкориро фаро гирифта, заминаи мусоиди густариши робитаҳои тиҷоратӣ, иқтисодӣ, илмӣ-техникӣ, гумрукӣ, фарҳангӣ ва гуманитариро миёни ду кишвар боз ҳам таҳким мебахшанд.
Аз ҷумла, дар доираи ин рӯйдоди муҳим Ёддошти тафоҳум оид ба ҳамкорӣ дар соҳаи содирот миёни Агентии содироти назди Ҳукумати Ҷумҳурии Тоҷикистон ва Бюро оид ба рушди содироти назди Вазорати тиҷорати Ҷумҳурии Мардумии Чин ба имзо расид.
Ҳамчунин, Ёддошти тафоҳум оид ба ҳамкорӣ миёни Агентии содироти назди Ҳукумати Ҷумҳурии Тоҷикистон ва Медиакорпоратсияи Чин низ ба имзо расонида шуд, ки метавонад барои муаррифии бештари имкониятҳои содиротии Тоҷикистон ва тақвияти корҳои иттилоотиву таблиғотӣ дар бозори Чин заминаи мусоид фароҳам оварад.
Ба имзо расидани санадҳои нави ҳамкорӣ, бахусус дар самти содирот, аз таваҷҷуҳи рӯзафзуни ҷонибҳо ба рушди савдои мутақобилан судманд, пешбурди маҳсулоти ватанӣ ба бозорҳои нав ва таҳкими робитаҳои институтсионалӣ миёни сохторҳои марбутаи ду кишвар шаҳодат медиҳад.