20 октябри соли 2025 дар ҳошияи 35-умин ҷаласаи Шӯрои ҳамоҳангсозии прокурорҳои генералии давлатҳои - иштирокчии ИДМ (ШҲПГ ИДМ) дар Душанбе мулоқоти дуҷониба байни Прокурори генералии Ҷумҳурии Тоҷикистон Воҳидзода Ҳ.С. ва Прокурори генералии Федератсияи Россия Гутсан А.В. баргузор гардид.
Зимни музокирот прокуророни генералӣ масъалаҳои мубрами ҳамкории дуҷониба ва таъмини амнияти минтақавиро баррасӣ карданд. Таваҷҷуҳи асосӣ ба хатарҳои шадидтарин, аз қабили мубориза бо терроризм ва экстремизм, муқовимати муштарак ба ҷинояткории трансмиллии муташаккил ва таҳияи чораҳои муассир оид ба мубориза бо ҷинояткории киберӣ равона карда шуд.
Инчунин, дар заминаи таҳкими муносибатҳои дуҷониба, масъалаҳои ҳифзи ҳуқуқ ва манфиатҳои муҳоҷирони меҳнатӣ ва аъзои оилаи онҳо мавриди муҳокима қарор гирифтанд.
Ҳар ду ҷониб сатҳи баланди ҳамкорӣ ва умумияти равишҳоро дар ҳифзи волоияти қонун таъкид намуда, аҳамияти стратегии таҳкими ҳамкориҳоро дар ин соҳаҳо қайд карданд.
Ҳамчунин зимни мулоқот ду созишномаи калидии байниидоравӣ - Созишнома дар бораи ҳамкорӣ байни Прокуратураи генералии Ҷумҳурии Тоҷикистон ва Прокуратураи генералии Федератсияи Россия, инчунин Созишнома оид ба ҳамкории мақомоти прокуратураҳои ҳарбӣ ба имзо расонида шуданд.
Ин ҳуҷҷатҳо заминаи шартномавӣ-ҳуқуқии муносибатҳои дуҷонибаро таҳким бахшида, ба тақвияти ҳамкорӣ дар соҳаи назорат, татбиқи ҳуқуқ ва инчунин ба ҳамоҳангсозии муассири фаъолияти прокуратураҳои ҳарбӣ равона шудаанд. Созишномаҳои баимзорасида барои таҳкими қонуният ва таъмини амният дар соҳаҳое, ки вокуниши махсусро талаб мекунанд, аҳамияти калидӣ доранд.