Дар ҳошияи баргузории Конфронси 31-уми тарафҳои Конвенсияи қолабии Созмони Милали Муттаҳид оид ба тағйирёбии иқлим (COP31), ки дар шаҳри Анталияи Ҷумҳурии Туркия баргузор мегардад, мулоқоти Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода бо Вазири экология ва захираҳои табиии Ҷумҳурии Қазоқистон Алибек Куантиров баргузор гардид.
Зимни мулоқот ҷонибҳо масъалаҳои муҳими ҳамкориҳои дуҷониба дар самти ҳифзи муҳити зист, истифодаи оқилонаи захираҳои табиӣ, мубориза бо тағйирёбии иқлим ва татбиқи ташаббусҳои минтақавию байналмилалии экологиро мавриди баррасӣ қарор доданд.
Ҳамзамон, ба масъалаҳои таҳкими ҳамкориҳои кишварҳо дар самти ҳифзи гуногунии биологӣ, ҳифзи экосистемаҳо, идоракунии захираҳои обӣ, мубориза бо биёбоншавӣ ва дигар мушкилоти мубрами экологӣ таваҷҷуҳи махсус зоҳир гардид.
Ҷонибҳо зарурати густариши ҳамкориҳои судманд, табодули таҷриба ва иттилооти соҳавӣ, инчунин таҳкими ҳамоҳангсозии фаъолиятро дар доираи созмонҳои байналмилалӣ ва минтақавӣ муҳим арзёбӣ намуданд.
Дар фарҷоми мулоқот омодагии ҷонибҳо ҷиҳати идомаи муколамаи созанда ва тақвияти ҳамкориҳои мутақобилан судманд ба манфиати ҳифзи муҳити зист ва таъмини рушди устувор таъкид гардид.
Гуфта шуд, ки Ёддошти тафоҳум байни вазорату идораҳои дахлдори ду кишвар, ки ҳанӯз 3 майи соли 2023 ба имзо расидааст, заминаи муҳими ҳамкориҳои дуҷониба миёни Тоҷикистону Қазоқистон боқӣ мемонад.