Имрӯз мулоқоти гурӯҳи дӯстии Маҷлиси намояндагони Маҷлиси Олии Ҷумҳурии Тоҷикистону Ҷумҳурии Мардумии Чин бо ҳайати ин кишвар, ки барои иштирок дар ҷаласаи Кумитаи доимии Ассамблеяи парламентии Осиё оид ба масъалаҳои иҷтимоӣ ва фарҳангӣ ба шаҳри Душанбе омадаанд, баргузор гардид.
Гуфта шуд, ки муносибатҳои байнидавлатии Ҷумҳурии Тоҷикистон ва Ҷумҳурии Мардумии Чин бар пояи эътимод, эҳтироми мутақобила ва баробарӣ бунёд ёфтаанд. Ба шарофати иродаи сиёсии роҳбарони ду давлат ин муносибатҳо пайваста рушд намуда, ба сӯи оянда равона шудаанд.
Муносибатҳои дӯстонаи Президенти Ҷумҳурии Тоҷикистон –Пешвои миллат муҳтарам Эмомалӣ Раҳмон ва Раиси Ҷумҳурии Мардумии Чин, ҷаноби Си Ҷинпин, барои рушди минбаъдаи робитаҳои дуҷониба заминаи устувор фароҳам оварданд.
Таъкид шуд, ки муколамаи байнипарлумонӣ, фаъолияти гурӯҳҳои дӯстӣ, ҳамкории кумитаҳои соҳавӣ, табодули таҷрибаи қонунгузорӣ, инчунин сафарҳои мутақобилаи вакилони парламент метавонанд ба муносибатҳои дуҷонибаи кишварҳо неруи тоза бахшанд.
Ҳамкории байнипарлумонӣ бояд ба таҳкими ҳамдигарфаҳмӣ ва эътимод, густариши робитаҳо байни кишварҳои мо ва мусоидат ба татбиқи тавофуқоти дар сатҳи олӣ бадастомада равона гардад.
Ҳадафи мулоқоти имрӯза баррасии вазъи муносибатҳои дуҷониба дар доираи Ассамблеяи парламентии Осиё ва муайян намудани роҳҳои минбаъдаи таҳкими ҳамкории байнипарлумонӣ мебошад.
Мо Ассамблеяи парламентии Осиёро ҳамчун майдони муҳимми рушди муколамаи байнипарлумонӣ, густариши ҳамкорӣ миёни кумитаҳои соҳавӣ ва табодули таҷрибаи қонунгузорӣ арзёбӣ менамоем.
Тоҷикистон иштироки фаъоли Ҷумҳурии Мардумии Чинро дар фаъолияти Ассамблеяи парламентии Осиё истиқбол намуда, омода аст минбаъд низ дар доираи ин сохтори муҳимми парламентӣ ва дигар сохторҳои байналмилалӣ бо ҷониби Чин ҳамкории созанда дошта бошад.
Изҳори боварӣ карда шуд, ки гурӯҳи дӯстӣ ва ҳамкориҳои байнипарлумонӣ дар рушди табодули байнипарлумонӣ, густариши ҳамдигарфаҳмӣ ва таҳкими дӯстии байни халқҳои Тоҷикистон ва Чин нақши боз ҳам созанда ва мусбат хоҳад дошт.