18–20 сентябри соли 2026 дар Федератсияи Россия интихоботи вакилони Думаи давлатӣ баргузор гардид. Дар доираи назорати байналмилалии раванди интихобот дар Федератсияи Россия ҳайати нозирони Ассамблеяи байнипарлумонии давлатҳои узви Иттиҳоди Давлатҳои Мустақил (АБП ИДМ) иштирок намуд. Дар ҳайати гурӯҳи байналмилалии нозирони АБП ИДМ дар мониторинги ҷараёни раванди интихобот муовини Раиси Маҷлиси намояндагони Маҷлиси Олии Ҷумҳурии Тоҷикистон Гиёзода Азиз иштирок дошт.
Гурӯҳи байналмилалии нозирони АБП ИДМ аз 96 нафар иборат буда, аз ҳисоби намояндагони парламентҳои давлатҳои узви Иттиҳод, инчунин мутахассисони Институти байналмилалии мониторинги рушди демократияи АБП ИДМ ташкил карда шуда буд.
Дар давраи фаъолияти ҳайати нозирон мониторинги ташкил ва баргузории овоздиҳӣ дар шаҳри Санкт-Петербург ва як қатор минтақаҳои дигари Федератсияи Россия анҷом дода шуд. Нозирон аз қитъаҳои интихоботӣ боздид намуда, бо фаъолияти комиссияҳои интихоботӣ, ташкили раванди интихобот ва шароити фароҳамшуда барои амалӣ намудани ҳуқуқҳои интихоботии шаҳрвандон шинос шуданд.
Дар барномаи будубоши нозирони байналмилалӣ дар шаҳри Санкт-Петербург вохӯриҳо бо намояндагони мақомоти давлатӣ ва ниҳодҳое, ки бевосита ба ташкили раванди интихобот алоқаманд мебошанд, ҷойгоҳи хос доштанд. Аз ҷумла, вохӯриҳо бо Губернатори шаҳри Санкт-Петербург Александр Беглов, Раиси Маҷлиси қонунгузории шаҳри Санкт-Петербург Александр Бельский, намояндагони Комиссияи интихоботии шаҳри Санкт-Петербург, инчунин судяи Суди конститутсионии Федератсияи Россия Сергей Князев баргузор гардиданд.
Дар ҷараёни вохӯриҳо масъалаҳои ташкилию дастрасии раванди интихобот, фаъолияти комиссияҳои интихоботӣ, таъмини татбиқи ҳуқуқҳои интихоботии шаҳрвандон, инчунин истифодаи технологияҳои муосири иттилоотӣ ва рақамӣ мавриди баррасӣ қарор гирифтанд.
Назорати байналмилалӣ яке аз самтҳои ҳамкории байнипарлумонӣ ба ҳисоб рафта, ба намояндагони мақомоти қонунгузори давлатҳои Иттиҳод имкон медиҳад, ки таҷрибаи амалиро мубодила намоянд, бо хусусиятҳои ташкили раванди интихобот шинос шаванд ва масъалаҳои мубрами рушди ниҳодҳои парламентиро баррасӣ кунанд.