24.08.26 Имрӯз дар деҳаи Барзгарони ноҳияи Абдураҳмони Ҷомӣ вохӯрии вакили Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии Ёвон №29 Ҳасанзода Насрулло бо фаъолони Ҷамоати деҳоти Дӯстӣ ва Ифтихор баргузор гардид.
Ҳасанзода Насрулло зимни суханронӣ таъкид намуд, ки робитаи доимӣ бо интихобкунандагон, баррасии саривақтии масъалаҳои мардум ва саҳм гузоштан дар ҳалли мушкилоти иҷтимоӣ аз вазифаҳои муҳимми вакили мардумӣ ба ҳисоб меравад.
Дар ҷараёни вохӯрӣ масъалаҳои муҳимми иҷтимоиву иқтисодӣ, ободонию созандагӣ ва беҳтар намудани шароити зиндагии сокинон мавриди баррасӣ қарор гирифтанд. Ҳамзамон, иштирокдорон вобаста ба масъалаҳои мавҷуда андешаву пешниҳодҳои худро баён намуданд.
Зикр шуд, ки ба пешвози сазовори ҷашни муқаддас ва бузурги миллиамон - 35-солагии Истиқлолияти давлатӣ Пешвои миллат соли 2026-ро «Соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ» эълон карданд. Ва ин пешниҳод на танҳо мақомоти давлатӣ, балки ниҳодҳои ҷомеаи шаҳрвандӣ, ҳизбҳои сиёсӣ, созмонҳои ҷамъиятӣ ва тамоми мардуми шарафманди мамлакатро водор намуд, ки бо камоли масъулият дар бунёдкорию ободонӣ ва амалӣ намудани сиёсати ватандўстонаи роҳбарияти мамлакат саҳм гиранд.
Дар фарҷоми вохӯрӣ таъкид гардид, ки чунин мулоқотҳо барои таҳкими робитаи вакил бо мардум, баланд бардоштани фаъолнокии шаҳрвандӣ ва мусоидат ба ҳалли масъалаҳои муҳимми ҷомеа аҳаммияти хос доранд.