Имрӯз Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо муовини раиси Маҷлиси миллии Ҷумҳурии Корея ҷаноби Пак Ток Хим мулоқот намуд.
Зимни мулоқот зикр шуд, ки муносибатҳои дипломатӣ байни Ҷумҳурии Тоҷикистон ва Ҷумҳурии Корея соли 1992 барқарор шуда, пайваста рушд ёфта, имрӯз ба сатҳи сифатан нав расидаанд.
Гуфта шуд, ки кишвари мо ба таҳкими муносибатҳои мутақобилан судманд бо бисёр кишварҳои Осиёи Ҷанубу Шарқӣ, бахусус бо Ҷумҳурии Корея, манфиатдор аст.
Хурсандиовар аст, ки муносибатҳои дуҷонибаи кишварҳои мо айни замон доираи васеи соҳаҳо, аз муколамаи сиёсии сатҳи баланд ва ҳамкориҳои байнипарлумонӣ то ҳамкориҳои тиҷоратӣ, иқтисодӣ, сармоягузорӣ, илмӣ-техникӣ, маориф, фарҳанг ва башардӯстонаро фаро мегиранд.
Мо ба рушди муносибатҳои байнипарлумонӣ ва дипломатияи байнипарлумонӣ ҳамчун механизми муҳимми ҳамкориҳои байналмилалӣ ва таҳкими эътимод байни кишварҳоямон аҳаммияти хоса медиҳем, -изҳор кард Файзалӣ Идизода.
Маҷлиси намояндагон бо мақсади баланд бардоштани самаранокии фаъолият ва парламентаризм бо 69 кишвари олам, аз ҷумла Ҷумҳурии Корея гурӯҳи дӯстӣ ва ҳамкориҳои байнипарлумонӣ таъсис додааст.
Фаъолияти гурӯҳҳои дӯстӣ ва ҳамкориҳои байнипарлумонӣ, ки ҳамчун унсури муассир дар тақвияти ҳамдигарфаҳмӣ, мубодилаи афкор ва таҷрибаи қонунгузорӣ, густариши робитаҳо байни вакилони парлумон ва рушди муколамаи созанда байни мақомоти қонунгузории давлатҳоямон хизмат мекунанд, муҳим дониста шуд.
Бо қаноатмандӣ зикр шуд, ки ҳаҷми тиҷорати мутақобила байни кишварҳои мо дар соли 2025 ба 196,1 миллион доллари ИМА расидааст.
Қайд гардид, ки ки имрӯз дар Тоҷикистон беш аз 25 корхона бо иштироки сармояи Корея бомуваффақият фаъолият мекунанд ва ҳаҷми умумии сармоягузориҳои мустақим аз Ҷумҳурии Корея аз сад миллион доллари ИМА гузаштааст.
Мо умедворем, ки ба бозорҳои босуръат рушдёбандаи сармоя, технология, захираҳои маъданӣ, нақлиёт ва маҳсулоти саноатӣ, ки дар онҳо Ҷумҳурии Корея мавқеи пешсафро ишғол мекунад, бештар ворид шавем.
Мо ҷонибдори ҳамкории устувор дар бисёр соҳаҳои муносибатҳои дуҷониба, таъсиси чаҳорчӯбаи зарурии ҳуқуқии байналмилалӣ ва истифодаи имконоти мавҷуда ба манфиати мардумонамон ҳастем. Аз ин рӯ, пешниҳод менамоем, ки дар оянда барои ҳалли як қатор масъалаҳои марбут ба тайёр кардани кадрҳои баландихтисос, мубодилаи таҷриба дар истеҳсоли маҳсулоти технологияи баланд ва кишоварзӣ ва роҳандозии алоқаи мустақими ҳавоӣ байни кишварҳои мо корҳои шоистаро анҷом диҳем.
Мо боварӣ дорем, ки имрӯз ҳамаи заминаҳои зарурӣ барои густариши ҳамкорӣ байни кумитаҳои дахлдори парлумонҳои мо ва гурӯҳҳои дӯстии байнипарлумонӣ, инчунин тақвияти мубодилаи таҷриба дар соҳаи фаъолияти қонунгузорӣ мавҷуданд.
Ман итминон дорам, ки сафари шумо ба Тоҷикистон як марҳилаи муҳим дар рушди минбаъдаи муносибатҳои Тоҷикистону Корея хоҳад буд ва уфуқҳои наверо барои густариши ҳамкориҳои мутақобилан судманд байни парлумонҳои мо боз хоҳад кард, -гуфт дар фарҷом Файзалӣ Идизода.