Имрӯз Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо Вазири корҳои хориҷии Ҷумҳурии Кипр ҷаноби Константинос Комбос мулоқот намуд.
Зикр шуд, ки муносибатҳои дипломатӣ байни Ҷумҳурии Тоҷикистон ва Ҷумҳурии Кипр бар пояи усулҳои умумиэътирофгардидаи эҳтироми ҳамдигарӣ, баробарҳуқуқӣ, эътимод ва ҳусни тафоҳум ҳанӯз 27 феврали соли 1992 барқарор гардида, пайваста рушд намуда истодаанд.
Маҷлиси намояндагон ба рушди робитаҳои байнипарламентии бисёрҷониба ва дуҷонибаи судманд дар доираи дипломатияи байнипарламентӣ аҳаммияти хоса медиҳад.
Мо бар он назарем, ки дипломатияи парламентӣ имрӯз ба яке аз механизмҳои муҳимми таҳкими эътимод, густариши муколама ва наздиксозии мавқеъҳои давлатҳо ба шумор меравад. Дар ин замина аз рушди робитаҳо миёни мақомоти қонунгузории ду кишвар истиқбол менамоем.
Омодаем, ки ҳамкориҳоро дар ин ҷода тавассути табодули мубодилаи сафарҳои ҳайатҳои парламентӣ, таҷрибаи қонунгузорӣ ва идомаи ҳамоҳангсозии мавқеъҳо дар созмонҳои байналмилалии парламентӣ тақвият бахшем.
Мо аз таваҷҷуҳи ҷониби Ҷумҳурии Кипр ба густариши робитаҳои байнипарламентӣ ва пешниҳоди марбут ба рушди ҳамкориҳо байни мақомоти қонунгузории ду кишвар истиқбол менамоем.
Ҳамзамон бо ин, аз сатҳу муҳтавои ҳамкориҳои мо дар чорчӯби ташкилотҳои бонуфузи байналмилалии байнипарламентӣ мисли Иттиҳоди Байнипарламентӣ, Парламенти Иттиҳоди Аврупо ва Ассамблеяи Парламентии Осиё изҳори қаноатмандӣ менамоем.
Тоҷикистон ва Ҷумҳурии Кипр шарикии судманди гуногунҷанбаро дар доираи Иттиҳоди Аврупо ва дигар сохторҳои ҳамкории бисёрҷониба, бахусус дар чорчӯби Созмони Милали Муттаҳид ва муассисаҳои тахассусии он, инчунин, САҲА роҳандозӣ намуда, пайгирона пеш мебаранд.
Таҳкими робитаҳои байнипарламентӣ ва табодули фарҳангӣ метавонанд дар таҳкими дӯстӣ ва ҳамдигарфаҳмии байни халқҳои мо саҳми назаррас гузоранд, - гуфт дар анҷоми суҳбат Файзалӣ Идизода.