Имрӯз дар Маҷлиси намояндагони Маҷлиси Олии Ҷумҳурии Тоҷикистон ҷиҳати иҷрои дастуру супоришҳои Президенти Ҷумҳурии Тоҷикистон - Пешвои миллат муҳтарам Эмомалӣ Раҳмон, ки зимни мулоқот бо фаъолон, намояндагони ҷомеа ва ходимони дини мамлакат аз 9 марти соли 2024 баён гардиданд мулоқот дар мавзуи “Масъалаҳои таълиму тарбия, сифати таҳсилот, гузариш ба низоми 12 солаи таълим” баргузор гардид.
Чорабиниро муовини якуми Раиси Маҷлиси намояндагони Маҷлиси Олии Ҷумҳурии Тоҷикистон Шермуҳаммад Шоҳиён ифтитоҳ намуда, таъкид кард, ки масъалаҳои бамиёнгузошташуда воқеан барои рушди устувори давлат ва ҷомеаи мо аҳаммияти калидӣ доранд. Соҳаи илму маориф ва танзими арзишҳои маънавию фарҳангӣ, аз ҷумла фаъолияти динӣ ва риояи анъанаҳои миллӣ, аз ҷумлаи самтҳое мебошанд, ки бевосита ба ташаккули ҷаҳонбинӣ, маърифат ва сатҳи масъулияти шаҳрвандии насли наврас таъсир мерасонанд.
Раиси Кумитаи дин ва танзими ҷашну маросими назди Ҳукумати Ҷумҳурии Тоҷикистон Давлатзода Сулаймон доир ба иҷрои Қонуни Ҷумҳурии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон” ва дастуру супоришҳои Президенти Ҷумҳурии Тоҷикистон - Пешвои миллат муҳтарам Эмомалӣ Раҳмон, ки зимни мулоқот бо фаъолон, намояндагони ҷомеа ва ходимони дини мамлакат аз 9 марти соли 2024 баён гардиданд, ба ҳозирин маълумоти муфассал пешниҳод намуд.
Каримзода Ҷамшед- муовини вазири маориф ва илми Ҷумҳурии Тоҷикистон доир ба ваъзи таълиму тарбия дар муассисаҳои таълимии кишвар, инчунин тадбирҳои баланд бардоштани сифати таълиму тарбия ва чораҳои ҳамкории байниидоравӣ андешаронӣ намуд.
Вакилони Маҷлиси намояндагон ба маърузачиён саволҳо дода, ҷавобҳои қонеъкунанда гирифтанд.