9–10 апрели соли 2026 дар шаҳри Тошканд, Ҷумҳурии Ӯзбекистон муколамаи сеюми минтақавии вакилони парлумони кишварҳои Осиёи Марказӣ таҳти унвони «Миқёспазири иқтисоди даврӣ дар Осиёи Марказӣ тавассути роҳбарии бизнес, навоварӣ ва механизмҳои молиявӣ» баргузор гардид, ки дар он Ориф Амирзода — раиси Комиссияи экологии Маҷлиси намояндагони Маҷлиси Олии Ҷумҳурии Тоҷикистон, Фирдавс Саидзода — муовини раиси Кумита оид ба энергетика, саноат, сохтмон ва коммуникатсия ва Фарҳод Каримзода — узви ҳамин Кумита иштирок намуданд.
Муколама дар доираи барномаи SWITCH-Asia бо дастгирии Иттиҳоди Аврупо ва Маркази минтақавии экологии Осиёи Марказӣ (CAREC) доир шуд.
Дар муколама вакилони парлумон, намояндагони институтҳои байналмилалии молиявӣ, бахши хусусӣ ва ҷомеаи коршиносони кишварҳои Осиёи Марказӣ иштирок намуданд.
Аҳаммияти тақвияти ҳамкории минтақавӣ ва нақши парлумонҳо дар ташаккули муҳити танзимии пешгӯишаванда, ки ба сармоягузориҳои устувор ва рушди қарорҳои даврӣ мусоидат мекунад, махсус таъкид гардид.
Ориф Амирзода зимни суханронӣ қайд намуд, ки гузариш ба иқтисоди даврӣ на танҳо диду назари стратегиро талаб мекунад, балки фароҳам овардани шароити мушаххас барои сармоягузорӣ, рушди бозор ва ҷалби бахши хусусиро низ тақозо менамояд.