26 ва 27 марти соли равон дар пойтахти Туркманистон, шаҳри Ашқобод вакилони Маҷлиси намояндагони Маҷлиси Олии Ҷумҳурии Тоҷикистон Дустмуродзода Сурайё ва Абдусаломзода Мунаввар дар нишасти сатҳи баланди «Гуфтугӯи байнипарлумонӣ доир ба тақвияти қонунгузорӣ барои таъмини рушди баробарии гендерӣ ва муқовимат ба зуроварии гендерӣ”, ки бо ташаббуси Маҷлиси Туркманистон, Форуми Осиёгии байнипарлумонӣ оид рушди аҳолӣ, Хазинаи нуфуси аҳолии СММ ва дигар шарикони рушд барпо гардид, иштирок намуданд.
Дар нишасти мазкур ҳайати вакилони Маҷлиси Туркманистон бо сарварии Раиси Маҷлиси Туркманистон Дунёгузел Гулманова, Флоренс Бауэр, директори минтақавии Хазинаи нуфуси Созмони Милали Муттаҳид дар Аврупои Шарқӣ ва Осиёи Марказӣ, директори иҷроияи Форуми Осиёгӣ оид ба нуфуси аҳолӣ ва рушд, доктор Фаррух Усмонов ва дигар роҳбарони ниҳодҳои ҷамъиятӣ ва ташкилотҳои бонуфузи пайваст ба масоили ҳуқуқи инсон, муқовимат ба зуроварӣ ва баробарии гендерӣ иштироку суханронӣ намуданд.
Вакили Маҷлиси намояндагони Маҷлиси Олии Ҷумхурии Тоҷикистон Дустмуродзода Сурайё вобаста ба мутобиқгардонии санадҳои меъёрию ҳуқуқӣ дар самти баробарии гендерӣ доир ба вазъи кунунии ҷаҳони муосир ва пешбурди рӯзномаи баробарии гендерӣ дар сатҳи мақоми олии қонунгузори кишварамон баромад намуд. Дастовардҳои назарраси кишвар дар пешбурди муввафақонаи сиёсати гендерӣ, омори дақиқ, рунамоии санадҳои меъёрию ҳуқуқӣ, аз ҷумла қонунҳо, стратегияҳо, консепсияҳо, барномаҳои давлатӣ ба ҳозирин пешниҳод гашта, аз ҷониби коршиносони кишварии Хазинаи нуфуси аҳолии СММ баҳои хуб дода шуд.
Ҳамзамон, ба шабакаҳои давлатии Телевизиони Туркманистон, шабакаи давлатҳои аъзои ИДМ «МИР 24», рӯзномаи Маҷлиси Туркманистон мусоҳибаҳо барпо гардид.