Рӯзҳои 3 ва 5 марти соли 2026 дар маҷлисгоҳи Маҷлиси намояндагони Маҷлиси Олии Ҷумҳурии Тоҷикистон бо иштироки вакилон, кормандони дастгоҳи Маҷлиси намояндагон ва коршиносони байналмиллалӣ ҷаласаҳои онлайни барои таҳияи барномаи машварати дарпешистода дар мавзуи “Нақши зеҳни сунъи дар фаъолияти Маҷлиси намояндагони Маҷлиси Олии Ҷумҳурии Тоҷикистон” баргузор гардид.
Дар рафти ҷаласаҳо иштирокчиён масъалаҳои калидии рӯзномаи машварат, аз ҷумла имконоти истифодаи технологияҳои зеҳни сунъӣ барои баланд бардоштани самаранокии раванди қонунгузорӣ, автоматикунонии вазифаҳои муқаррарӣ ва таҳлили ҳаҷми зиёди маълумотро баррасӣ карданд.Таваҷҷуҳи махсус ба таъмини шаффофияти фаъолияти парламент бо истифода аз технологияҳои зеҳни сунъӣ, инчунин таҷрибаи байналмилалӣ дар ин самт равона карда шуд.
Вакили Маҷлиси намояндагон Зафар Ализода ба иштирокчиён маълумот дод, ки бо мақсади иҷрои дастуру супоришҳои Сарвари давлат –муҳтарам Эмомалӣ Раҳмон дар самти гузариш ба истифодаи васеи технологияҳои рақамӣ, ки дар Паёми навбати ба Маҷлиси Олӣ ва зимни суханронӣ дар ҷаласаи якуми иҷлосияи якуми Маҷлиси намояндагони Маҷлиси Олии Ҷумҳурии Тоҷикистон даъвати ҳафтум аз 19 марти соли 2025 баён гардиданд, дар Маҷлиси намояндагони Маҷлиси Олии Ҷумҳурии Тоҷикистон Консепсияи гузариш ба технологияҳои рақамӣ ва инноватсионӣ таҳия ва қабул гардидаст.
Дар ин замина, бо мақсади амалӣ гаштани вазифаҳои Консепсияи мазкур, аз ҷониби коршиносон ва масъулони Маҷлиси намояндагони Маҷлиси Олии Ҷумҳурии Тоҷикистон, дар ҳамкорӣ бо мақомотҳои дахлдори давлатӣ, шарикони рушд ва коршиносони миллӣ масъалаҳои танзими қонунгзуории мавҷуда, ташкили чорабиниҳои иттилоотӣ-омузишӣ бо мақсади баланд бардоштани иқтидорҳои иштирокчиёни раванди қонунгузорӣ, азнавсозӣ, такмили сомона ва портали Интернетии Маҷлиси намояндагони Маҷлиси Олии Ҷумҳурии Тоҷикистон ба роҳ монда шудааст.
Қайд гардид, ки чорабиниҳои омӯзишии ба нақша гирифташуда, дар доираи Консепсияи ҳамкории Маҷлиси намояндагони Маҷлиси Олии Ҷумҳурии Тоҷикистон бо барномаи «Волоияти қонун ва дастрасӣ ба адолат», ки аз ду самти асоси а) баланд бардоштани иқтидори вакилону мушовирон, б) навсозӣ ва такмили сомонаи расмии Маҷлиси намояндагони Маҷлиси Олии Ҷумҳурии Тоҷикистон иборат аст, амалӣ мегардад.
Дар рафти вохӯриҳо иштирокчиён таклифҳои худро вобаста ба барномаи омузишӣ иброз намуда, дар бораи самтҳои асосии мавзуӣ ва муҳлати баргузории чорабинӣ ба мувофиқа расиданд.