12.02.26 Имрӯз дар Китобхонаи миллии Тоҷикистон таҳти раёсати муовини Раиси Маҷлиси намояндагони Маҷлиси Олии Ҷумҳурии Тоҷикистон, роҳбари Гурӯҳи кории (Парламентӣ) оид ба нуфуси аҳолӣ ва рушд Мавсума Муинӣ дар мавзуи «Дастовард ва чолишҳо дар раванди амалишавии сиёсати баробарии гендерӣ дар Тоҷикистон» ҳамоиши байналмилалӣ баргузор гардид, ки дар он вакилони Маҷлиси намояндагон, масъулини Дастгоҳи Маҷлиси намояндагон, намояндагони Маҷлиси миллии Маҷлиси Олӣ, Судии Олии Ҷумҳурии Тоҷикистон, Сафири фавқулода ва мухтори Ҷопон дар Ҷумҳурии Тоҷикистон, намояндагони вазоратҳои корҳои дохилӣ ва меҳнат, муҳоҷират ва шуғли аҳолӣ, кумитаҳои кор бо занон ва оила, кор бо ҷавонон ва варзиш, ҳифзи муҳити зисти назди Ҳукумати Ҷумҳурии Тоҷикистон, намояндагони созмонҳои байналмилалии Форуми Парламентҳои Осиёӣ оид ба нуфуси аҳолӣ ва рушд (AFPPD), Хазинаи нуфуси СММ дар Тоҷикистон (UNFPA), намояндагони ҷомеаи шаҳрвандӣ, коршиносони миллӣ, васоити ахбори умум ва вакилони парламентҳои кишварҳои Филиппин, Индонезия ва Македонияи Шимолӣ, ноиби Президент оид ба ҳамкории стратегӣ ва инноватсияи “Pathfinder International” (тариқи маҷозӣ) ширкат варзиданд.
Муинӣ Мавсума қайд намуд, ки масъалаи баробарии гендерӣ дар саросари ҷаҳон ба яке аз масъалаҳои муҳими рӯз мубаддал гардидааст.
Таъкид шуд, ки Ҳукумати Ҷумҳурии Тоҷикистон таҳти роҳбарии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба хотири таъмини риояи ҳуқуқҳои конститутсионии занон, фароҳам овардани шароити муносиби кориву зиндагӣ барои занон, таҳкими мақому манзалати онҳо дар ҷомеа мутобиқи меъёрҳои ҷомеаи демократӣ, ҳуқуқбунёд ва дунявӣ сиёсати давлатии занонро роҳандозӣ намуда, зимнан баҳри ҳалли масъалаҳои муҳимтарини ҳаёти занон силсила асноди меъёрии ҳуқуқиро қабул ва мавриди иҷро қарор додааст.
Тоҷикистон санадҳои асосии байналмилалии ҳуқуқи башар, аз ҷумла Конвенсия дар бораи барҳам додани ҳама шаклҳои табъиз нисбати занонро тасдиқ намудааст.
М.Муинӣ зикр намуд, ки сиёсати дохилии гендерӣ соли 1994 бо қабули Конститутсияи Ҷумҳурии Тоҷикистон шакл гирифта, бо ба тасвиб расидани Фармони Президенти Ҷумҳурии Тоҷикистон аз 3 декабри соли 1999 «Дар бораи баланд бардоштани нақши занон дар ҷомеа», Консепсияи миллии фаъолгардонии нақши занон дар Тоҷикистон ва Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занону духтарони болаёқат нақш ва мақоми занон дар мамлакат боло рафта, зимнан қонунҳои Ҷумҳурии Тоҷикистон "Дар бораи кафолатҳои давлатии баробарҳуқуқии мардон ва занон ва имкониятҳои баробари амалигардонии онҳо”, “Дар бораи пешгирии зӯроварӣ дар оила”, Стратегияи миллии фаъолгардонии нақши занон дар Ҷумҳурии Тоҷикистон барои солҳои 2021-2030, Барномаи давлатии пешгирии зӯроварӣ дар оила қабул гардид, ки муносибатҳоро барои таъмини кафолатҳои конститутсионии баробарҳуқуқии мардону занон дар соҳаҳои иҷтимоӣ, сиёсӣ, фарҳангӣ танзим менамояд.
Ҳамоиш дар панҷ бахш, аз ҷумла, “Раванди татбиқи барномаҳои миллӣ ва дурнамои минтақавӣ дар масоили баробарии гендерӣ, нақши ҷомеаи шаҳрвандӣ дар амалинамоии сиёсати баробарии гендерӣ, қонунгузории миллӣ дар танзими масоили баробарии гендерӣ ва пешгирии зӯроварии гендерӣ, мубодилаи таҷриба дар самти таъмини баробарии гендерӣ ва таҳкими тавонмандии занону ҷавонон дар коҳиш додани хатарҳои глобалӣ: норасоии об, тағйирёбии иқлим ва ҳифзи пиряхҳо” идома ёфт ва дар он вакилони Маҷлиси намояндагон, намояндагони вазорату идораҳо, коршиносони милливу байналмилалӣ ва вакилони парламентҳои кишварҳои Филиппин, Индонезия ва Македонияи Шимолӣ, ноиби Президент оид ба ҳамкории стратегӣ ва инноватсияи “Pathfinder International” (тариқи маҷозӣ) дар мавзуҳои гуногун баромад намуда, доир ба тадбирҳое, ки дар самти пешбурди сиёсати гендерӣ аз ҷониби сохторҳо анҷом дода шудааст мубодилаи афкор намуданд.
Вакилони Парлумони Тоҷикистон барои пешбурди баробарии гендерӣ тавассути таҳияву такмили қонунгузории миллӣ, чораҳои зарурӣ меандешанд ва барои ноил шудан ба Ҳадафҳои Рушди Устувор дар таъмини баробарии гендерӣ ва тавонмандсозии занону духтарон тамоми кӯшишҳоро ба харҷ медиҳанд.
Имрӯз занони тоҷик дар ҳамаи шохаҳои ҳокимияти давлатӣ, мақомоти олии қонунгузор, ҳокимияти судӣ ва иҷроия, иттиҳодияҳои ҷамъиятӣ фаъолият намуда, дар пешрафти соҳаҳои гуногуни ҳаёти ҷомеа ҳиссаи худро мегузоранд, зикр намуд Мавсума Муинӣ.
Дар рафти ҳамоиш иштирокчиён ҷанбаҳои гуногуни масъалаҳои бахшҳои чорабиниро мавриди баррасӣ қарор дода, миёни худ мубодилаи афкор ва таҷриба намуданд.