25. 01. 26 Дар доираи иҷлосияи шонздаҳуми пленарӣ, ки дар шаҳри Манамаи Подшоҳии Баҳрайн баргузор гардида истодааст, Муовини якуми Раиси Маҷлиси намояндагони Маҷлиси Олии Ҷумҳурии Тоҷикистон Шермухаммад Шоҳиён бо Ҳамид Ҳоҷӣ Бобоӣ — муовини Раиси Маҷлиси машваратии исломии Ҷумҳурии Исломии Эрон мулоқот анҷом дод.
Ҷонибҳо хусусияти устувори муносибатҳои дуҷониба байни Ҷумҳурии Тоҷикистон ва Ҷумҳурии Исломии Эронро, ки бар пояи умумияти таърихӣ, фарҳангӣ ва забонӣ, инчунин эҳтироми мутақобила ва ҳамсоягии нек асос ёфтаанд, таъкид намуданд. Зикр гардид, ки муносибатҳои дипломатӣ байни ду кишвар аз замони барқароршавӣ (соли 1992) бомуваффақият рушд меёбанд.
Таваҷҷуҳи махсус ба масъалаҳои густариши ҳамкориҳои байнипарламентӣ, табодули таҷриба дар соҳаи фаъолияти қонунгузорӣ ва таҳкими ҳамкории байни кумитаҳои соҳавии парламентҳои ду давлат зоҳир карда шуд.
Мулоқот дар фазои созанда ва дӯстона баргузор гардида, ҳавасмандии мутақобилаи ҷонибҳоро ҷиҳати рушди минбаъдаи муколамаи байнипарламентӣ ва ҳамкорӣ оид ба масъалаҳои мавриди таваҷҷуҳи муштарак тасдиқ намуд.