12.01.26 Имрўз Раиси Кумитаи тартиботи ҳуқуқӣ, мудофиа ва амнияти Маҷлиси намояндагони Маҷлиси Олии Ҷумҳурии Тоҷикистон Маҳмудзода Насрулло бо Сафири Фавқулода ва Мухтори Ҷумҳурии Мардумии Чин дар Ҷумҳурии Тоҷикистон
муҳтарам Го Чжицзюн мулоқот намуд.
Гуфта шуд, ки Тоҷикистон ва Чинро муносибатҳои шарикии ҳамаҷонибаи стратегӣ пайваст менамоянд, ки бар асоси эҳтироми мутақобил, баробарҳуқуқӣ ва ба инобат гирифтани манфиатҳои якдигар рушд меёбанд.
Дар ин раванд гурӯҳҳои дӯстӣ ва ҳамкории байнипарламентӣ нақши махсус доранд. Фаъолияти онҳо ба барқарор гардидани робитаҳои мустақим ва боэътимод байни вакилон, густариши мубодилаи афкор ва ташаккули робитаҳои устувори ҳамкорӣ байни парламентҳои кишварҳоямон мусоидат мекунад. Мо бар онем, ки иқтидори гурӯҳҳои дӯстӣ ниёз ба фаъолгардонии минбаъда дорад.
Гурӯҳи байнипарламентии дӯстӣ ва ҳамкорӣ бо Маҷлиси умумихалқии намояндагони Ҷумҳурии Мардумии Чин яке аз аввалин гурӯҳҳое буд, ки пас аз ба даст овардани истиқлоли давлатӣ ва ташаккули Парламенти Ҷумҳурии Тоҷикистон таъсис ёфт.
Дар ин замина, ҷониби Тоҷикистон манфиатдор аст, ки ҳамкорӣ дар сатҳи кумитаҳои соҳавӣ, комиссияҳои парламентӣ ва гурӯҳҳои дӯстӣ байни Маҷлиси намояндагон ва Маҷлиси умумихалқии намояндагони Чин рушд дода шавад.
Мо ба ҳамкорӣ дар соҳаи амнияти минтақавӣ ва субот аҳаммияти махсус медиҳем ва саҳми ҷониби Чинро дар таъмини суботи минтақавӣ ва амният, инчунин дар рушди иҷтимоию иқтисодии Тоҷикистон баланд арзёбӣ менамоем.
Таҷрибаи пешрафтаи Ҷумҳурии Мардумии Чин дар самти таъмини қонунгузории амнияти миллӣ, такмили механизмҳои ҳуқуқӣ ва назорати парламентӣ шоистаи омӯзиш аст.
Дар фарҷом, мехостам изҳор намоям, ки мулоқоти имрӯза боз як қадами муҳим дар роҳи таҳкими дӯстӣ ва шарикии ҳамаҷонибаи стратегӣ байни кишварҳоямон ва ҳамкории байнипарламентии Тоҷикистону Чин гардида, ба ҳамкории байни Маҷлиси намояндагони Маҷлиси Олии Ҷумҳурии Тоҷикистон ва Маҷлиси умумихалқии намояндагони Ҷумҳурии Мардумии Чин такони нав мебахшад, - гуфт Насрулло Маҳмудзода.