Имрўз Раиси Маҷлиси намояндагони Маҷлиси Олии Ҷумҳурии Тоҷикистон Идизода Файзалӣ Сафири Фавқулода ва Мухтори Шоҳигарии Арабистони Саудӣ дар Ҷумҳурии Тоҷикистон Валид ибни Абдураҳмон Ар-Решайдонро ба ҳузур пазируфт.
Ҷонибҳо аз сатҳи имрӯзаи муносибатҳо миёни Тоҷикистону Арабистони Саудӣ изҳори қаноатмандӣ намуданд.
Зикр карда шуд, ки дар натиҷаи муколамаи сиёсии сатҳи олии ду кишвар муносибатҳои судманд мунтазам рушд ёфта, заминаи ҳуқуқии робитаҳои ду кишвари бо ҳам дӯст таҳким меёбанд.
Зимни мулоқот ҷонибҳо ба вазъи ҷомеаи ҷаҳонӣ, ҳамкориҳо дар самти таъмини амният дар минтақа, инчунин соҳаҳои сиёсиву иқтисодӣ, тиҷорату сармоягузорӣ ва фарҳангиву башарӣ, аз ҷумла афзоиши ҳаҷми мубодилаи мол, тавсеаи сохтори тиҷорати мутақобила ва ҷалби бештари сармоягузорони Арабистони Саудиро ба соҳаҳои мухталифи иқтисоди Тоҷикистон мавриди баррасӣ қарор доданд.
Дар мулоқот, ҳамчунин, атрофи дигар масъалаҳои мавриди таваҷҷуҳ мубодилаи афкор сурат гирифт.
Дар анҷоми мулоқот Валид ибни Абдураҳмон Ар-Решайдон зикр намуд, ки муҳлати ваколати Сафириаш дар кишвари мо ба анҷом расидааст ва аз Тоҷикистон хотироти нек дорад.