Имрӯз дар Маҷлиси намояндагон доир ба Паёми Президенти Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» ҷаласа баргузор гардид.
Роҳбари Дастгоҳи Маҷлиси намояндагон Абдуҷабор Сатторзода зикр намуд, ки Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олӣ «Дар бораи самтҳои асосии сиёсати дохилӣ ва хориҷии ҷумҳурӣ» аз 16 декабри соли равон ҷанбаҳои гуногуни ҳаёти сиёсию иқтисодӣ ва иҷтимоию фарҳангиро дарбар мегирад. Ин санад, дар баробари муайян намудани самтҳои асосии сиёсати дохилӣ ва хориҷӣ, инчунин масъалаҳои муҳимро, ки барои ояндаи дурахшони давлату миллат таъсири амиқ доранд, фарогир аст.
Тавре Президенти мамлакат муҳтарам Эмомалӣ Раҳмон дар Паёмашон иброз доштанд, таъмин намудани шароити хуб ва ҳаёти арзанда барои шаҳрвандони Ҷумҳурии Тоҷикистон муҳимтарин вазифа ва рисолати давлат маҳсуб мешавад. Барои ба вуҷуд овардани шароити арзандаи зиндагӣ ба шаҳрвандони ҷумҳурӣ, пеш аз ҳама, боло бурдани масъулияти хизматчиёни давлатӣ, аз ҷумла мову шумо зарур аст.
Пешвои муаззами миллат муҳтарам Эмомалӣ Раҳмон зимни пешниҳоди Паём ба Маҷлиси Олӣ изҳор доштанд, ки ояндаи давлати мо аз рушди илму маориф, тарбияи ҷавонон ва дар руҳияи худшиносию ватандӯстӣ тарбия намудани онҳо вобаста мебошад. Аз ин рӯ, рӯ овардан ба илму техника ва техналогияи замони муосир, инчунин доштани эҳсоси баланди худогоҳиву худшиносӣ ва меҳанпарастӣ имкон медиҳад, ки давлати мо боз ҳам беш аз пеш рушд кунад ва зиндагии шоиставу саодатманд ба мо муяссар гардад. Албатта, ҳамаи мову шумо баҳри саривақт ба ҳадафҳо ва иҷрои вазифаҳои дар Паём гузоштаи Сарвари давлат бо дилу нияти пок ва кушишҳои пайваста саҳми хешро хоҳем гузошт, -гуфт дар фарҷом А. Сатторзода.
Мушовири калони Кумита оид ба қонунгузорӣ ва ҳуқуқи инсон Шамолиён Бахтиёр ва муовини сардори раёсати ҳуқуқ Мансурӣ Шодмон ба сухан баромада, ба ҳозирин роҷеъ ба Паёми Сарвари давлат муҳтарам Эмомалӣ Раҳмон ба ҳозирин маълумот манзур намуданд.