11.12.25 Гиёзода Азиз - муовини Раиси Маҷлиси намояндагони Маҷлиси Олии Ҷумҳурии Тоҷикистон бо муовини вазири умури хориҷаи Ҷумҳурии Исломии Эрон оид ба корҳои консулӣ, парлумонӣ ва ҳамватанони эронӣ Ваҳид Ҷалолзода мулоқот кард.
Зикр шуд, ки муносибатҳои дипломатӣ байни Ҷумҳурии Тоҷикистон ва Ҷумҳурии Исломии Эрон 9 январи 1992 барқарор шуда, дар ҳолати рушд қарор доранд.
Ҷонибҳо масоили марбут ба роҳу воситаҳои таҳкими ҳамкориҳои байнипарлумонӣ, фаъолияти Гурӯҳҳои дӯстӣ ва дигар масъалаҳои мавриди таваҷҷуҳи мутақобиларо баррасӣ намуданд.
Гиёзода Азиз таъкид намуд, ки робитаҳои мақомоти қонунгузор дар фароҳам овардани заминаи мусоид барои тавсеаи ҳамкорӣ дар бахшҳои мухталиф, аз ҷумла иқтисоду тиҷорат нақши муҳим доранд.
Байни ду кишвар беш аз 200 созишномаю тафоҳумномаҳо ва дигар санадҳои ҳамкорӣ ба имзо расидааст.
Дар анҷоми мулоқот муовини Раиси Маҷлиси намояндагони Маҷлиси Олии Ҷумҳурии Тоҷикистон Гиёзода Азиз қайд намуд, ки ҳамкориҳои мо дар самти муносибатҳои бисёрҷониба дар чорчӯби СММ, Созмони ҳамкориҳои иқтисодӣ, Созмони ҳамкории исломӣ ва Созмони ҳамкории Шанхай роҷеъ ба вазъи минтақа ва таҳаввулоти байналмилалӣ, масоили марбут ба амнияти минтақа, мубориза бо терроризм, сепаратизм, экстремизм, ҷиноятҳои муташаккилона ва муомилоти ғайриқонунии маводи нашъаовар густариш меёбанд ва мавқеи наздику яксонро касб намудаанд.
Тоҷикистон аз кишвари дӯсти Эрон барои ҷонибдории ташабусҳои байналмилалии Чумҳурии Тоҷикистон дар ҷомеаи ҷаҳонӣ миннатпазир буда, омодаи ҳамкориҳои боз ҳам қавитар ва судманд мебошад.