04 12 25. Имрӯз дар Душанбе конференсияи байналмилалии илмӣ-амалӣ дар мавзуи “Пешгирии кирдорҳои коррупсионӣ ҳамчун воситаи ҳифзи ҳуқуқи инсон ва таъмини амнияти миллӣ: мушкилот ва роҳҳои ҳал” баргузор гардид, ки дар он Азиззода Ғайрат- Вакили Маҷлиси намояндагон, узви Кумита оид ба сохтори давлатӣ ва худидоракунии маҳаллӣ иштирок ва суханронӣ намуд.
Ғайрат Азиззода зикр кард, ки коррупсия ба мисли вабое мебошад, ки на танҳо иқтисод, низоми давлатӣ ва рушди устувори ҷомеаро заиф месозад, балки ба ҳуқуқ ва озодиҳои инсон таҳдид мерасонад. Ин зуҳуроти номатлуб эътимоди мардум ба мақомоти давлатӣ ва низоми қонунгузориро коста намуда, сохторҳои муҳими ҷомеаро заиф мегардонад. Аз ин рӯ, пешгирии коррупсия ҳамчун воситаи самараноки ҳифзи ҳуқуқ ва озодиҳои инсон бояд яке аз афзалиятҳои стратегӣ ва амалӣ барои ҳар як давлат ва ҳар як ниҳоди давлатӣ бошад.
Асосгузори сулҳу ваҳдати миллӣ-Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон борҳо таъкид кардаанд: «Мубориза бо коррупсия ва тақвияти шаффофият дар фаъолияти давлатӣ заминаи рушди устувор ва ҳифзи ҳуқуқи инсонро таъмин менамояд». Ин нуктаро метавон ҳамчун роҳнамои стратегӣ дар ҳама сатҳҳои идоракунии давлатӣ ва ҷомеа қабул намуд,- изҳор кард Ғ. Азиззода.
Истифодаи технологияҳои рақамӣ дар низоми қонунгузорӣ ба мо имкон муҳайё месозад, ки коррупсияро самаранок пешгирӣ намоем, эътимоди шаҳрвандонро ба давлат баланд бардорем ва ҳифзи ҳуқуқ ва озодиҳои инсонро тақвият бахшем.
Ҳамчунин, ҳамкорӣ ва мубодилаи таҷрибаҳои байналмилалӣ шароит фароҳам меорад, ки роҳҳои беҳтарини мубориза бо коррупсия ва механизми таъминкунандаи ҳуқуқи инсонро муайян намуда, онро дар доираи сиёсати давлатӣ ва стратегии миллии Тоҷикистон татбиқ намоем.