Имрӯз дар шаҳри Машҳади Ҷумҳурии Исломии Эрон ҷаласаи навбатии Кумитаи доимии умури сиёсии Ассамблеяи Парлумонии Осиё баргузор гардид, ки дар он Шермуҳаммад Шоҳиён - муовини якуми Раиси Маҷлиси намояндагони Маҷлиси Олии Ҷумҳурии Тоҷикистон иштирок ва суханронӣ намуд. Шермуҳаммад Шоҳиёнро дар ин сафар Иброҳимзода Неъматулло - вакили Маҷлиси намояндагон, узви Кумита оид ба корҳои байналмилалӣ, иттиҳодияҳои ҷамъиятӣ ва иттилоот ва Ҷамшедзода Комрон - мушовири калони муовини якуми Раиси Маҷлиси намояндагон ҳамроҳӣ менамояд.
Дар ҷаласа намояндагони 15 кишварҳои минтақа иштирок намуданд.
Пеш аз оғози ҷаласа, муовини якуми Раиси Маҷлиси намояндагони Маҷлиси Олии Ҷумҳурии Тоҷикистон Шермуҳаммад Шоҳиён бо Раиси Маҷлиси Шурои Исломии Ҷумҳурии Исломии Эрон Муҳаммад Боқири Қолибоф мулоқот анҷом доданд.
Зимни мулоқот доираи васеи масъалаҳои густариши ҳамкориҳои байнипарлумонӣ, иқтисодию тиҷоратӣ ва дигар масъалаҳои муҳимми муносибатҳои ду кишвар мавриди муҳокима қарор гирифтанд.
Ҷаласа бо сухани ифтитоҳии Раиси Маҷлиси Шурои Исломии Ҷумҳурии Исломии Эрон Муҳаммад Боқири Қолибоф оғоз гардид.
Шермуҳаммад Шоҳиёнро котиби ҷаласаи Кумитаи доимии умури сиёсии Ассамблеяи Парлумонии Осиё интихоб намуданд.
Зимни суханронӣ Шермуҳаммад Шоҳиён қайд намуд, ки Асамблеяи порлумонии Осиё имрӯз пеш аз ҳар вақти дигар ба таҳкими робитаҳо ниёз дорад, махсусан бо созмонҳои бонуфузи байналмиллалӣ ва кишварҳои шарику ҳамфикр, ки сулҳу суботро ба андозаи зарурӣ муҳим арзёбӣ мекунанд ва ҷонибдори сулҳу амният минтақа мебошад.
Ташаббуси нави Президентии Ҷумҳурии Тоҷикистон, Пешвои миллат муҳтарам Эмомалӣ Раҳмон оид ба эълон доштани "Даҳсолаи таҳкими сулҳ барои наслҳои оянда", ки аз минбари Созмони Миллали Муттаҳид садо дод, ба самъи иштирокдорони ҷаласа расонида шуд. Ин ташаббус дар шароити пурихтилоф ва вазъи ноустувори ҷаҳон, имрӯз барои ҳамкориҳои судманди кишварҳои минтақа ба хотири барқарорсозии сулҳи пойдор, заминаи мусоид фароҳам хоҳад овард.
Инчунин, Шермуҳаммад Шоҳиён оид ба саҳми Асамблеяи порлумонии Осиё дар пешбурди манофеи ҳамаи мардумони минтақаи Осиё, хусусан дар масъалаҳои рушди иқтисодӣ, умумияти фарҳангиву таърихӣ, тамаддуни ва маънавии мардумони минтақа андешаронӣ намуд.
Доир ба ҳамаи масъалаҳои баррасигардида қарорҳои дахлдор қабул карда шуд.