Дар Душанбе Форуми байналмилалии ташкилотҳои ҷомеаи шаҳрвандии Осиёи Марказӣ дар мавзуи “Ҳамкорӣ барои пешрафт: роҳ ба сӯи баробарии гендерӣ” баргузор гардид, ки дар он Муовини Раиси Маҷлиси намояндагони Маҷлиси Олии Ҷумҳурии Тоҷикистон Мавсума Муинӣ иштирок ва суханронӣ намуд.
Форуми мазкур аз ҷониби Ташкилоти ҷамъиятии “Гендер ва тараққиёт” дар ҳамбастагӣ бо Кумитаи кор бо занон ва оилаи назди Ҳукумати Ҷумҳурии Тоҷикистон баргузор гардида, дар он вакилони Маҷлиси намояндагон, намояндагони вазорату идораҳо, шарикони рушд, созмонҳои миллию байналмилалӣ ва коршиносони байналмилалӣ аз кишварҳои Қазоқистон, Қирғизистон ва Ӯзбекистон иштирок ва суханронӣ намуданд.
М.Муинӣ зикр намуд, ки сиёсати дохилии гендерӣ соли 1994 бо қабули Конститутсияи Ҷумҳурии Тоҷикистон шакл гирифт, ки дар он шахс, ҳуқуқ ва озодиҳо арзиши олӣ эътироф гардида, ҳама дар назди қонун ва суд баробаранд.
Таъкид шуд, ки Ҳукумати Ҷумҳурии Тоҷикистон таҳти роҳбарии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар замони соҳибистиқлолии кишвар ба хотири таъмини риояи ҳуқуқҳои занон, фароҳам овардани шароити муносиби кориву зиндагӣ барои занон, таҳкими мақому манзалати онҳо дар ҷомеа мутобиқи меъёрҳои ҷомеаи демократӣ, ҳуқуқбунёд ва дунявӣ сиёсати давлатии занонро роҳандозӣ намуда, зимнан баҳри ҳалли масъалаҳои муҳимтарини ҳаёти занон силсила асноди меъёрии ҳуқуқиро қабул ва мавриди иҷро қарор додааст.
Ба тасвиб расидани Фармони Президенти Ҷумҳурии Тоҷикистон аз 3 декабри соли 1999 «Дар бораи баланд бардоштани нақши занон дар ҷомеа», Консепсияи миллии фаъолгардонии нақши занон дар Тоҷикистон ва Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занону духтарони болаёқат нақш ва мақоми занон дар мамлакат боло рафта, қонунҳои Ҷумҳурии Тоҷикистон "Дар бораи кафолатҳои давлатии баробарҳуқуқии мардон ва занон ва имкониятҳои баробари амалигардонии онҳо”, “Дар бораи пешгирии зӯроварӣ дар оила”, Стратегияи миллии фаъолгардонии нақши занон дар Ҷумҳурии Тоҷикистон барои солҳои 2021-2030, Барномаи давлатии пешгирии зӯроварӣ дар оила қабул гардид, ки муносибатҳоро барои таъмини кафолатҳои конститутсионии баробарҳуқуқии мардону занон дар соҳаҳои иҷтимоӣ, сиёсӣ, фарҳангӣ ва ғайра танзим менамояд.
Дар Форум вакили Маҷлиси намояндагон-узви Кумита оид ба сохтори давлатӣ ва худидоракунии маҳаллӣ Бибиосия Аюбӣ дар мавзуи “Заминаҳои таърихии қабули Қонуни Ҷумҳурии Тоҷикистон “Дар бораи кафолатҳои давлатии баробарҳуқуқии мардону занон ва имкониятҳои баробари амалигардонии онҳо” баромад намуда, зикр кард, ки дар самти пешбурди сиёсати гендерӣ аз ҷониби Маҷлиси намояндагони Маҷлиси Олии Ҷумҳурии Тоҷикистон корҳои муҳимму шоиста анҷом дода мешавад.