Раиси Кумита оид ба сохтори давлатӣ ва худидоракунии маҳаллӣ, роҳбари Гурӯҳи дӯстӣ ва ҳамкориҳои байнипарлумонии Тоҷикистону Шоҳигарии Арабистони Саудӣ Илҳом Камолзода бо сафири Шоҳигарии Арабистони Саудӣ Абдурраҳмон - Ар - Рушайдон мулоқот намуд.
Гуфта шуд, ки Гурӯҳҳои дӯстии байнипарлумонӣ барои рушди робитаҳои сиёсӣ, иқтисодӣ, фарҳангӣ ва иҷтимоии кишварҳои мо нақши муҳим мебозанд.
Тоҷикистон ва Арабистони Саудӣ таърихан робитаҳои дӯстона ва эҳтироми мутақобила доранд. Мо бовар дорем, ки фаъолияти густардаи гурӯҳҳои дӯстии байнипарлумонӣ метавонад ин равобитро ба сатҳи нав барорад. Парлумонҳо, ҳамчун ниҳодҳои намояндагӣ ва қонунгузор, метавонанд на танҳо ҷамбаҳои сиёсиро мустаҳкам кунанд, балки ҳамкориҳои иқтисодӣ, фарҳангӣ низ амиқтар гардонанд.
Илҳом Камолзода зикр кард, ки мо ҷонибдори таҷдид ва густариши сафарҳои кории ҳайатҳои парламентӣ ҳастем. Бо чунин сафарҳо вакилони мардумӣ метавонанд ба таври мустақим аз таҷрибаи қонунгузорӣ ва сиёсати иқтисодии ду кишвар огоҳ гарданд.
Пешниҳод шуд, ки мизҳои мудаввари муштарак ташкил карда шавад, ки дар он мавзуъҳои асосӣ — қонунгузорӣ, рушди иқтисод, сармоягузорӣ, ва мубориза бо экстремизм мавриди баррасӣ қарор гиранд. Чунин мулоқотҳо ба табодули таҷрибаи муфид ва ташкили гурӯҳҳои кори муштарак мусоидат хоҳанд кард.