Мавсума Муинӣ зикр намуд, ки Тоҷикистон бо Созмони амният ва ҳамкорӣ дар Аврупо (САҲА) ҳамкории фаъол дорад. Дафтари барномаҳои САҲА дар Душанбе шабакаи 14 маркази захиравиро барои занон дастгирӣ мекунад, ба онњо кӯмакҳои ҳуқуқӣ ва равонӣ мерасонанд, курсҳои омӯзишӣ барои соҳибкорӣ ва рушди мустақилияти иқтисодиро пешниҳод менамоянд.
Ҷумҳурии Тоҷикистон бо Ҷумҳурии Финляндия робитаҳои пурсамар ва дӯстона дошта, гурӯҳи дӯстӣ ва ҳамкориҳои байнипарлумонии Маҷлиси намояндагони Маҷлиси Олии Ҷумҳурии Тоҷикистон ва Парлумони Ҷумҳурии Финландия таъсис ёфтааст. Вакилони Маҷлиси намояндагони Маҷлиси Олии Ҷумҳурии Тоҷикистон дар ташаббусҳои САҲА фаъолона иштирок мекунанд.
Мавсума Муинӣ қайд намуд, ки Ҷумҳурии Тоҷикистон ба масъалаҳои вобаста ба иштироки занон дар мақомоти қонунгузор таваҷҷуҳи махсус зоҳир менамояд. Имрўз ҳиссаи занон дар Маҷлиси намояндагон тақрибан 29 фоизро ташкил медиҳад, ки ин нишондиҳанда дар минтақаи Осиёи Миёна аз ҳама баланд буда, пешрафти воқеиро дар самти иштироки занон дар раванди қабули қарорҳо нишон медиҳад.
Таъкид шуд, ки пешгирии зӯроварии гендерӣ низ яке аз афзалиятҳои давлати мо мебошад. Тақвияти шабакаи марказҳои кӯмак, беҳтар намудани дастрасӣ ба ҳимояи ҳуқуқӣ ва баланд бардоштани савияи дониш ва малакаи мутахассисоне, ки ба дастгирӣ ва ҳифзи занон машғуланд, нақши муҳими хешро мебозад.
Ҳиссаи занон дар фаъолиятҳои иқтисодӣ ва рушди иҷтимоӣ рӯз то рӯз афзоиш ёфта истодааст. Дастгирии занон дар соҳибкорӣ, рушди малакаҳои рақамӣ, омӯзишҳои касбӣ ва дастрасӣ ба бозори меҳнат саҳми онҳоро дар рушди иқтисоди миллӣ тақвият мебахшад.
Изҳори боварӣ карда шуд, ки густариши ҳамкориҳо бо Парлумони Ҷумҳурии Финландия ва САҲА ба татбиқи тавсияҳои байналмилалӣ, мубодилаи таҷриба ва таҳияи механизмҳои амалии дастгирии занон мусоидат хоҳад кард.