Имрӯз дар Маҷлиси намояндагон таҳти раёсати муовини якуми Раиси Маҷлиси намояндагони Маҷлиси Олии Ҷумҳурии Тоҷикистон Шермуҳаммад Шоҳиён муҳокимаи парламентӣ «Оид ба иҷрои Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2025» дар 9 моҳи соли 2025» баргузор гардид.
Дар муҳокимаи парламентӣ вазири молия - Қаҳҳорзода Файзиддин, раиси Кумитаи давлатии сармоягузорӣ ва идораи амволи давлатӣ - Раҳимзода Султон, раиси Кумитаи андоз - Давлатзода Нусратулло, директори Агентии суғуртаи иҷтимоӣ ва нафақа - Ҳалимзод Абураҳмон, раиси Палатаи ҳисоб - Каримзода Ҷамшед, муовини якуми вазири тандурустӣ ва ҳифзи иҷтимоии аҳолӣ – Юсуфӣ Саломиддин, муовинони вазири молия – Қурбониён Сарвар ва Хайруллозода Шамсулло, муовини вазири рушди иқтисод ва савдо – Восидиён Фарҳод, муовини вазири маориф ва илм – Музаффарзода Бадриддин, муовини директори Агентии назорати давлатии молиявӣ ва мубориза бо коррупсия - Талбакзода Сулаймон, муовини якуми сардори Хадамоти гумрук - Турсунзода Азим, муовини раиси Бонки миллии Тоҷикистон - Назирӣ Гулбаҳор ва дигар шахсони даъватшуда иштирок намуданд.
Шермуҳаммад Шоҳиён зикр намуд, ки Мутобиқи моддаи 60 Конститутсияи Ҷумҳурии Тоҷикистон, инчунин моддаҳои 36 ва 37 Қонуни конститутсионии Ҷумҳурии Тоҷикистон «Дар бораи Маҷлиси Олии Ҷумҳурии Тоҷикистон», Маҷлиси намояндагон иҷрои Қонуни Ҷумҳурии Тоҷикистонро «Дар бораи Буҷети давлатии Ҷумҳурии Тоҷикистон» назорат менамояд.
Мақсади асосии муҳокимаи парламентӣ таҳлили ҳамаҷонибаи нишондиҳандаҳои даромад ва хароҷоти буҷет, баррасии самаранокии сиёсати молиявии давлат ва муайян намудани омилҳои таъсиргузор ба иҷрои нишондиҳандаҳои буҷет мебошад.
Дар шароити кунунӣ, ки иқтисоди ҷаҳонӣ таҳти таъсири омилҳои беруна ва дохилӣ қарор дорад, буҷети давлатӣ барои Ҷумҳурии Тоҷикистон на танҳо воситаи маблағгузории хароҷоти давлатӣ, балки фишанги муҳимми татбиқи сиёсати иҷтимоиву иқтисодӣ ва таҳкими суботи макроиқтисодӣ мебошад.
Раиси Кумита оид ба иқтисод ва молия Ашурзода Ғиёсиддин, вазири молия Қаҳҳорзода Файзиддин, раиси Кумитаи андози назди Ҳукумати Ҷумҳурии Тоҷикистон Давлатзода Нусратулло, директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон Ҳалимзода Абдураҳмон, раиси Палатаи ҳисоби Ҷумҳурии Тоҷикистон Каримзода Ҷамшед, муовини директори Агентии назорати давлатии молиявӣ ва мубориза бо коррупсия - Талбакзода Сулаймон дар назди ҳозирин бо маърузаву ҳисоботҳо баромад намуданд.
Раиси Кумита оид ба масъалаҳои аграрӣ, захираи об ва замин Латифзода Рустам, раиси Кумита оид ба энергетика, саноат, сохтмон ва коммуникатсия Шерализода Маҳмадулло, муовини раиси Кумита оид ба масъалаҳои иҷтимоӣ, оила ва ҳифзи саломатӣ, Маҷидзода Сарвиноз, узви Кумита оид ба сохтори давлатӣ ва худидоракунии маҳаллӣ Азиззода Ғайрат, узви Кумита оид ба илм, маориф, фарҳанг ва сиёсати ҷавонон Наҷмиддиниён Асадулло ба музокира баромада, перомуни иҷрои босифати буҷет ва самаранокии он таклифу пешниҳодҳо манзур намуданд.
Ба мақомоти дахлдор тавсия дода шуд, ки истифодаи мақсадноку шаффофи маблағҳои буҷетӣ, тақвияти интизоми молиявӣ ва баланд бардоштани масъулияти хизматчиёни давлатиро дар иҷрои буҷет таъмин намоянд.
Маҷлиси намояндагони Маҷлиси Олии Ҷумҳурии Тоҷикистон ҳамчун мақоми олии намояндагӣ ва қонунгузор раванди иҷрои буҷетро дар ҳамоҳангӣ бо Ҳукумати Ҷумҳурии Тоҷикистон таҳти назорати доимӣ нигоҳ медорад.
Аз рӯйи масъалаи муҳокимаи парламентӣ «Оид ба иҷрои Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2025» дар 9 моҳи соли 2025» тавсияҳои дахлдор қабул карда шуд.