Имрӯз Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо Сафири Фавқулода ва Мухтори Ҷумҳурии Фаронса дар Ҷумҳурии Тоҷикистон Элза Пинёл мулоқот намуд.
Ф. Идизода зикр кард, ки аз лаҳзаи ба даст овардани Истиқлолияти давлатии Тоҷикистон, Фаронса аз ҷумлаи аввалин давлатҳои абарқудрат буд, ки истиқлолияти моро эътироф намуд.
Аз замони барқарор гардидани муносибатҳои дипломатӣ миёни кишварҳои мо (соли 1992) то имрӯз равобити дуҷониба тадриҷан густариш меёбанд.
Дар ин замина, бояд аз иродаи сиёсӣ ва нақши Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Фаронса муҳтарам Эммануэл Макрон ёдовар шуд, ки ба рушду тавсеаи муносибатҳои дуҷониба такони ҷиддӣ мебахшанд ва онҳоро дар заминаи дарозмуддат устувор месозанд.
Ҳамкориҳои дуҷонибаи Тоҷикистону Фаронса бар асоси 30 созишномаи байналмилалӣ бунёд ёфтаанд, ки ба самаранокии талошҳои дипломатии ҷонибҳо мусоидат менамояд.
Изҳори боварӣ карда шуд, ки ҳамкориҳои байнипарламентӣ минбаъд низ рушд хоҳанд ёфт.
Таҳкими ҳамкориҳо дар чоҳорчӯбаи созмонҳои байналмилалӣ, аз ҷумла СММ, ЮНЕСКО, Иттиҳоди Аврупо, Иттиҳодияи байнипарламентӣ, САҲА, инчунин формати C5+1 муҳим арзёбӣ гардид.
Маҷлиси намояндагон ҷонибдори густариши минбаъдаи ҳамкориҳои самарабахш, таҳкими фаъолияти Гурӯҳҳои дӯстӣ ва ҳамкориҳои байнипарламентӣ буда, барои таҳкими равобити мутақобилан муфид талош хоҳад намуд.