Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода зимни сафари корӣ ба Ҷумҳурии Озарбойҷон бо Сафир ва кормандони сафоратхонаи Ҷумҳурии Тоҷикистон дар Ҷумҳурии Озарбойҷон мулоқот намуд.
Файзалӣ Идизода бо ин рӯйдоди аз ҳама муҳим ва накӯтарину пурбаҳои даврони соҳибистиқлолӣ - рӯзи қабули Конститутсияи Ҷумҳурии Тоҷикистон аҳли кормандони сафоратхонаро табрик намуда, изҳор кард, ки 6-ноябр ба қабули Конститутсияи Ҷумҳурии Тоҷикистон 31 сол пур мешавад. Ин санаи тақдирсоз барои ҳар яки мо ҳамчун ҷашни шаклгирии давлатдории миллӣ ва таҳкими амнияту суботи сиёсиву иҷтимоии кишвар аҳаммият ва шукӯҳи хоса дорад.
Конститутсияи Ҷумҳурии Тоҷикистон соли 1994 дар таърихи давлатдории тоҷикон бори нахуст тариқи раъйпурсии умумихалқӣ қабул гардид. Таи ин муддат, вобаста ба талаботҳои замон 26 сентябри соли 1999, 22 июни соли 2003 ва 22 майи соли 2016 ба он тариқи раъйпурсии умумихалқӣ тағйироту иловаҳо ворид карда шуданд. Тағйиру иловаҳои воридшуда барои ташкили низоми мукаммали ҳуқуқиву сиёсӣ дар кишвар имконият фароҳам оварда, заминаи устувори рушди давлату давлатдории навин, пешрафти иқтисодиву иҷтимоӣ ва ҷамъиятиву сиёсии мамлакат гардиданд.
Санадҳои ҳуқуқии байналмилалие, ки Тоҷикистон онҳоро эътироф кардааст, қисми таркибии низоми ҳуқуқии ҷумҳуриро ташкил медиҳанд.
Тоҷикистон сиёсати сулҳҷӯёнаро ба амал татбиқ намуда, соҳибихтиёрӣ ва истиқлолияти дигар давлатҳои ҷаҳонро эҳтиром менамояд.
Боиси хушнудист, ки боби 3 Конститутсияи Ҷумҳурии Тоҷикистон Маҷлиси Олӣ номгузорӣ шуда, фаъолияти парламенти кишварро танзим менамояд, - гуфт дар фарҷом Ф. Идизода.