29.10.25 Имрӯз Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода дар ҳошияи Конфронси байналмилалии парламентӣ бахшида ба 30-солагии Конститутсияи Ҷумҳурии Озарбойҷон бо Раиси Маҷлиси Миллии Ҷумҳурии Озарбойҷон хонум Саҳиба Али қизи Ғафарова мулоқот намуд.
Файзалӣ Идизода зимни мулоқот зикр намуд, ки мо фахр мекунем, ки дар ин чорабинии сатҳи баланд, бахшида ба 30-солагии қабули Конститутсияи Ҷумҳурии Озарбойҷон ҳузур дорем. Барои мо — вакилони Маҷлиси намояндагони Маҷлиси Олии Ҷумҳурии Тоҷикистон — ҳамкориҳо миёни кишварҳоямон, ки бар асоси эҳтироми мутақобил, ҳамкории созанда ва руҳи некбинона асос ёфтааст, аҳаммияти хоса дорад. Робитаҳои байнидавлатии Тоҷикистону Озарбойҷон бар асоси беш аз 94 санади байналмилалӣ ба роҳ монда шудаанд, ки аз самаранокии талошҳои дипломатии кишварҳоямон дарак медиҳад.
Дар ин замина, мехостам нақш ва аҳаммияти санадҳои асосиро, аз ҷумла Эъломияи ҳамкории стратегӣ миёни Ҷумҳурии Тоҷикистон ва Ҷумҳурии Озарбойҷон, махсус зикр намоям. Бешак, ин ҳуҷҷат ба рушди минбаъдаи муносибатҳои байни кишварҳои мо дар давраи дарозмуддат такони иловагӣ мебахшад.
Имрӯз дастовардҳое, ки дар муносибатҳои дуҷониба ба даст омадаанд натиҷаи талошҳои дипломатӣ, дӯстӣ ва иродаи сиёсие мебошанд, ки аз ҷониби Президенти Ҷумҳурии Тоҷикистон - Пешвои миллат муҳтарам Эмомалӣ Раҳмон ва Президенти Ҷумҳурии Озарбойҷон муҳтарам Илҳом Ҳайдар оғлу Алиев амалӣ мегарданд.
Зикр шуд, ки дипломатияи байнипарлумонӣ метавонад воситаи муассири пешбурди ҳадафҳои муштараки мо, таъмини самаранокии робитаҳои доимӣ миёни гурӯҳҳои дӯстӣ, пешбурди манфиатҳои мутақобилан судманд ва густариши муколамаи байналмилалӣ гардад.
Маҷлиси намояндагон минбаъд низ кӯшиш хоҳад кард, ки шарикии моро таҳким бахшад ва робитаҳоро рушд диҳад. Мо ҷонибдори тавсеа, амиқсозӣ ва таҳкими ҳамкории минтақавӣ, махсусан дар доираи созмонҳои байналмилалӣ мебошем.
Дар сатҳи ҷаҳонӣ мо ҳамеша дар руҳияи дӯстӣ ва ҳамкории мутақобилан судманд фаъолият намуда, ташаббусҳои созандаи Ҷумҳурии Озарбойҷонро ҷонибдорӣ менамоем.
Мо ҷонибдори боло бурдани самаранокии ҳамкориҳо бо Ҷумҳурии Озарбойҷон дар чаҳорчӯби СММ, Иттиҳоди байнипарлумонӣ, САҲА, ИДМ, ТРАСЕКА, САИ, ЭКО ва дигар созмонҳои байналмилалӣ ва минтақавӣ мебошем, - гуфт дар фарҷом Ф. Идизода.