Имрӯз Мулоқоти Муовини Раиси Маҷлиси намояндагони Маҷлиси Олии Ҷумҳурии Тоҷикистон Муинӣ Мавсума бо Намояндагони доимии Бунёди Аҳолии Созмони Милали Муттаҳид (ЮНФПА) баргузор гардид.
М. Муинӣ зикр намуд, ки масъалаҳои рушди аҳолӣ яке аз самтҳои афзалиятнок барои Ҷумҳурии Тоҷикистон ба шумор мераванд. Бо шарофати сиёсати хирадмандонаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон кишвари мо дар татбиқи Нақшаи амали Конфронси байналмилалии аҳолӣ ва рушд (МКНР) ба дастовардҳои назаррас ноил шудааст.
Тавре имрӯз дар чорабинии сатҳи баланд қайд намудем, яке аз шарикони асосии байналмилалии Парламенти Тоҷикистон дар масъалаҳои рушди аҳолӣ — Бунёди Аҳолии Созмони Милали Муттаҳид (UNFPA) мебошад, ки кӯмаки техникӣ ва экспертизаи касбиро дар ин самт пешниҳод мекунад.
Барои Парламенти кишвари мо ба анъанаи нек табдил ёфтааст, ки бо шарикон ва дастаи Бунёди Аҳолӣ дар Тоҷикистон вохӯриҳо баргузор намуда, нақшаҳои минбаъдаи ҳамкориро якҷо баррасӣ намоем.
Мушкилоти мураккаби мубориза бо камбизоатӣ, ҳифзи саломатӣ ва ҳуқуқҳои репродуктивӣ, боло бурдани нақши ҷавонон ва баробарии гендерӣ то ҳол тақозои равиши васеъ ва бисёрсоҳавиро дорад.
Нақши Парламент дар рушди аҳолӣ дар таҳия ва қабули қонунҳо, ворид намудани тағйироту иловаҳо ба қонунгузории амалкунанда, таҳкими ҳассосияти гендерӣ дар соҳаи ҳуқуқӣ ва муносибатҳои иҷтимоӣ, инчунин дар таҳкими заминаҳои мусоид дар сатҳи миллӣ тавассути иҷро ва назорати қонунҳо ва барномаҳои марбут ба татбиқи ҳадафҳои Конфронси байналмилалии аҳолӣ ва рушд (МКНР), бахусус дар соҳаи ҳифзи ҳуқуқҳои занон ва татбиқи ҳуқуқ ба саломатии репродуктивӣ ифода меёбад.
Боварии комил дорам, ки бо ҳамкории судманд байни вакилон ва ЮНФПА, инчунин бо мақомоти давлатӣ, созмонҳои ғайриҳукуматӣ ва ҷомеаи шаҳрвандӣ мо метавонем масъалаҳои дорои ҳар гуна мушкилотро ба таври муассир ҳал намоем.
Боздид аз бинои нави Парламенти кишвар, маҷлисгоҳу дафтарҳои кории барҳаво ба меҳмонон хуш омад.