Имрӯз ҷаласаи мушовараи ҳамоҳангсозии раисони кумитаҳо ва комиссияҳои мудофиа ва амнияти парламентҳои давлатҳои узви Созмони Аҳдномаи Амнияти Дастҷамъӣ дар шаҳри Душанбе баргузор гардид, ки дар он Раиси Кумитаи Маҷлиси намояндагони Маҷлиси Олии Ҷумҳурии Тоҷикистон оид ба тартиботи ҳуқуқӣ, мудофиа ва амният Насрулло Маҳмудзода иштирок ва суханронӣ намуд.
Зимни суханронӣ Насрулло Маҳмудзода зикр намуд, ки вохӯрии имрӯза барои гуфтугӯи озод, мубодилаи таҷриба ва мураттабсозии чораҳои муштарак барои ҳалли масъалаҳои муҳим дар соҳаи мудофиа ва амният имконияти хуберо фароҳам меорад. Ҷумҳурии Тоҷикистон ба тақвияти ҳамкорӣ дар чаҳорчӯбаи Созмони Аҳдномаи Амнияти Дастҷамъӣ (СААД) аҳаммияти калон медиҳад ва онро ҳамчун механизми муҳимми таъмини амнияти дастаҷамъӣ мешуморад.
Осиёи Марказӣ яке аз роҳҳои транзитӣ буда, Шарқро бо Ғарб, Шимолро бо Ҷануб мепайвандад ва дорои захираҳои бойи маъданӣ, обӣ, инчунин неруи кории афзоянда мебошад.
Дар замони муосир ҷангҳои иттилоотӣ ва кӯшишҳои ноустувор кардани вазъи дохилӣ, аз ҷумла паҳн намудани идеологияҳои радикалӣ бештар истифода мешаванд, ки дар онҳо мутаасифона ҷавонон, ки аз бетаҷрибагӣ ҳадафи аслии қувваҳои харобкор гардидаанд, бештар зарар мебинанд.
Омилҳои дигаре, ки ноустувории бештарро ба вуҷуд меоранд, тағйирёбии иқлим, обшавии суръатёфтаи пиряхҳо ва камбудии оби тоза мебошад, ки метавонад низоъҳои нави минтақавиро ба бор орад. Афзоиши аҳолӣ ва буҳрони муҳоҷират низ вазъи иҷтимоию иқтисодиро душвор намуда, ҳалли муштараки онҳоро талаб мекунад.
Пешсафии Тоҷикистон дар дипломатияи байналмилалӣ доир ба иқлим ва об махсус таъкид шуд. Тоҷикистон ташаббусгузори эълони соли 2025 ҳамчун Соли байналмилалии ҳифзи пиряхҳо ва рӯзи 21 марти ҳар сол ҳамчун Рӯзи ҷаҳонии пиряхҳо мебошад. Ин ташаббусҳо дар сатҳи СММ дастгирии васеъ пайдо намуда, стратегияи дарозмуддати ҳифзи муҳити зист, истифодаи устувори захираҳои обӣ ва мутобиқшавӣ ба тағйирёбии иқлимро ифода мекунанд.
Қайд шуд, ки дар шароити муосир муқобилият бо таҳдидҳо танҳо тавассути ҳамкории дастаҷамъӣ имконпазир аст. СААД нақши калидӣ дар таъмини субот дар минтақа дорад. Ҳамоҳангсозии фаъолият дар чаҳорчӯбаи ИДМ, Созмони Ҳамкории Шанхай, БРИКС ва тавассути платформаи СММ низ муҳим арзёбӣ гардид.