Имрӯз Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо ваколатдор оид ба ҳуқуқи инсон дар Федератсияи Россия хонум Т. Н. Москалкова мулоқот намуд.
Файзалӣ Идизода зикр намуд, ки мо ҳамкорӣ бо Федератсияи Россияро, ки дар заминаи шарикии судманди дуҷониба ва муносибатҳои дӯстонаи таърихӣ ташаккул ёфтааст, муҳим арзёбӣ менамоем.
Бо ташаккули пойгоҳи васеи ҳуқуқии байналмилалӣ, ки зиёда аз 300 санади байнидавлатиро миёни Тоҷикистону Федератсияи Россия дар бар мегирад, имкони ба роҳ мондани ҳамкориҳо дар соҳаҳои гуногун, аз ҷумла дар самти ҳимояи ҳуқуқ ва озодиҳои шаҳрвандон ба вуҷуд омадааст.
Қобили зикр аст, ки пояи ин муносибатҳо зиёда аз бист сол аст, ки тавассути иродаи сиёсӣ ва ташаббусҳои созандаи Сарони давлатҳоямон — Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Федератсияи Россия муҳтарам Владимир Путин гузошта шудааст.
Дар ин замина, мо мавҷудияти Созишнома оид ба ҳамкорӣ байни ваколатдорони ҳуқуқи инсон (омбудсменҳо) -и Тоҷикистон ва Россияро, ки соли 2011 имзо шудааст, муҳим мешуморем.
Ташкили ин ниҳоди умумибашарии ҳифзи ҳуқуқ ва озодиҳои инсон — Ваколатдор оид ба ҳуқуқи инсон аз роҳи устувори демократии рушди кишварҳоямон шаҳодат медиҳад.
Институти омбудсмен, ки соли 2008 таъсис ёфт ва дар пайи он Ваколатдор оид ба ҳуқуқи кӯдак дар кишвари мо арзи вуҷуд намуд, дар ҷараёни ислоҳоти ҳуқуқӣ самаранокии худро нишон дода истодааст.
Мутобиқи қонунгузории кишвари мо фаъолияти ин ниҳод ба таҳкими кафолатҳои конститутсионӣ барои ҳифзи давлатии ҳуқуқу озодиҳои инсон ва шаҳрванд ва мусоидат ба риояи онҳо равона шудааст.
Яке аз нуқтаҳои муҳимми ҳамкории мо бо ин ниҳод пешниҳоди гузориши солонаи омбудсмен оид ба вазъи риояи ҳуқуқу озодиҳои инсон ва шаҳрванд дар Ҷумҳурии Тоҷикистон мебошад. Инчунин, механизми пешниҳоди гузоришҳои махсус оид ба масъалаҳои алоҳидаи поймолшавии ҳуқуқу озодиҳои инсон ва шаҳрванд, вазъи риояи ҳуқуқ вобаста ба баробарӣ ва аз байн бурдани ҳама гуна шаклҳои табъиз дар Ҷумҳурии Тоҷикистон ба роҳ монда шудааст.
Механизмҳои зикршуда таъсири мусбӣ ба такмили қонунгузории миллӣ, аз ҷумла қонунгузории таъминкунандаи ҳуқуқу озодиҳои шаҳрвандон мерасонанд.
Маҷлиси намояндагон ба рушди муносибатҳои гуманитарӣ байни кишварҳоямон таваҷҷуҳи хоса зоҳир менамояд. Муколамаи доимӣ ва ҳамкории судманду созанда бо Думаи давлатии Федератсияи Россия ба роҳ монда шудааст. Гурӯҳи дӯстӣ ва ҳамкории байнипарламентӣ таъсис ёфта, хуб фаъолият дорад.
Бояд зикр намуд, ки бо тақвият ёфтани робитаҳо дар соҳаҳои гуманитарӣ ва маориф айни замон дар Тоҷикистон 71 мактаб фаъолият дорад, ки таълим дар онҳо ба забони русӣ ба роҳ монда шудааст, инчунин 3 филиали донишгоҳҳои пешқадами Россия амал мекунанд.
Зикр кардан ҷоиз аст, ки бо мақсади таъмини ҳуқуқ ва озодиҳои шаҳрвандон, омӯзиши забони русӣ, ки тибқи Конститутсияи Ҷумҳурии Тоҷикистон забони муоширати байни миллатҳо мебошад, хуб ба роҳ монда шудааст.
Корҳои босамар дар самти ҳифзи ёдгориҳои таърихӣ, бахусус дар бораи Ҷанги Бузурги Ватанӣ, анҷом дода мешаванд, ки мо имсол якҷоя 80-солагии ин санаи муҳимми таърихиро бо шукӯҳ таҷлил намудем.
Рушд ва таҳкими муносибатҳои стратегӣ байни кишварҳоямон аз фаъолияти босамари парламентҳо, робитаҳои байни идораҳо ва ниҳодҳои соҳавӣ, ба роҳ мондани ҳамкорӣ ва тасвиби шартномаҳои байналмилалӣ низ вобаста аст.
Дар ин замина, Парламенти Тоҷикистон ба пешрафти раванди ҳамкориҳои дуҷониба саҳми муносиби худро мегузорад.
Маҷлиси намояндагон пайваста кӯшиш ба харҷ медиҳад, ки шарикии стратегӣ, дӯстӣ ва ҳамбастагиро дар чаҳорчӯби ҳамкориҳои байналмилалӣ, бахусус фаъолияти Гурӯҳи дӯстӣ ва ҳамкории байнипарламентӣ таҳким бахшад.