Санаи 26 сентябри соли 2025 ҳайати Гурӯҳи дӯстӣ ва ҳамкории байнипарламентии Тоҷикистон бо Сафири Ҷумҳурии Исломии Эрон ҷаноби Алиризо Ҳақиқиён мулоқоти судманд анҷом доданд.
Сараввал Шодиён Муҳаммад Султонзода – раиси Кумитаи Маҷлиси намояндагони Маҷлиси Олии Ҷумҳурии Тоҷикистон оид ба илм, маориф, фарҳанг ва сиёсати ҷавонон - Роҳбари Гурӯҳи дӯстӣ ва ҳамкории байнипарламентӣ меҳмони олиқадрро хайрамақдам гуфта, иброз намуданд, ки аз замони барқароршавии робитаҳои дипломатӣ байни Ҷумҳурии Тоҷикистон ва Ҷумҳурии Исломии Эрон муносибатҳои Ҷумҳурии Тоҳикистон бо кишвари ба мо дусту бародар Ҷумҳурии Исломии Эрон ба таври бесобиқа густариш ёфтаанд.
Қайд гардид, ки мардумони Тоҷикистон ва Эронро решаҳои амиқи таърихӣ, забон, фарҳанг ва тамаддуни муштарак мепайвандад, ки аз умқи таърих пайвандӣ дошта, боиси ифтихори мост. Ҳамкориҳои гуногунҷабҳаи Тоҷикистон ва Эрон, бахусус ҳамкориҳои байнипарламентӣ давоми 34 сол, бахусус ду соли охир бо ташаббусҳои созандаи роҳбарияти олии кишварҳоямон, Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон ва Президенти Ҷумҳурии Исломии Эрон, муҳтарам Масъуд Пизишкиён батадриҷ ва бомаром вусъат ёфта, боиси қаноатмандӣ аст.
Сипас, меҳмони олиқадр, ҷаноби Сафир барои пазироии самимӣ изҳори миннатдорӣ намуда, қайд намуданд, ки идома додани ҳамкориҳои судманд дар соҳаҳои мухталифи сиёсӣ, иқтисодӣ, тиҷоратӣ, амният, фарҳангиву гуманитарӣ, хусусан, дар ҷодаи муносибатҳои байнипарлумонии ду кишвари ба ҳам дусту бародар мувофиқи мақсад буда, ҷониби Эрон ҷиҳати густариш додани самтҳои нави ҳамкориҳо бо Ҷумҳурии Тоҷикистон дар доираи санадҳои ҳамкории баимзорасидаи байни ду кишвар ҳамеша омода аст.
Дар фарҷоми мулоқот Шодиён Муҳаммад Султонзода қайд намуданд, ки мо ба густариши устувори ҳамкорӣ бо Маҷлиси Шурои исломии Ҷумҳурии Исломии Эрон манфиатдор буда, муколама дар доираи механизмҳои Иттиҳоди Байнипарламентӣ, Ассамблеяи Парламентҳои Осиё, Иттиҳоди Парламентии давлатҳои аъзои Созмони Ҳамкории Исломӣ, мубодилаи сафарҳои расмии ҳайати гурӯҳҳои дустӣ ва ҳамкории байнипарламентиро ба роҳ монда, ҷиҳати ба пешравиҳо ноил гардидан, талошҳои муштаракро ба харҷ хоҳем дод.
Баъди мулоқот аз ҷониби ҳайати Гурӯҳи дӯстӣ ва ҳамкории байнипарламентии Тоҷикистон ба меҳмони олиқадр бо супоридани тўҳфаи рамзӣ анҷом ёфт.