Имрӯз дар Маҷлиси намояндагони Маҷлиси Олии Ҷумҳурии Тоҷикистон ҳамоиши вакилзанон таҳти унвони “Занон ва сиёсати миллӣ: таҷриба, дастовардҳо ва дурнамо” бо ташаббуси Кумитаи Иҷроияи Марказии Ҳизби Халқии Демократии Тоҷикистон дар ҳамкорӣ бо Фраксияи Ҳизби Халқии Демократии Тоҷикистон дар Маҷлиси намояндагони Маҷлиси Олии Ҷумҳурии Тоҷикистон баргузор гардид.
Дар ҳамоиш Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода, Муовини Сарвазири Ҷумҳурии Тоҷикистон Дилрабо Мансурӣ, Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода, Муовини якуми Раиси ҲХДТ Маликшо Неъматзода, вакилзанони Маҷлиси намояндагони Маҷлиси Олии Ҷумҳурии Тоҷикистон, вакилони Маҷлисҳои вакилони халқи Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе ва шаҳру ноҳияҳои тобеи ҷумҳурӣ иштирок ва суханронӣ намуданд.
Зикр гардид, ки дар сиёсати миллии мо, ки бар пояи ғояхои созандагӣ, ваҳдат ва адолати иҷтимоӣ устувор аст, ҳамеша занон мавқеи хоса доранд. Аз рӯзҳои нахустини соҳибистиқлолии ватан то имрӯз бо ҳидояту пуштибониҳои Пешвои миллат, Раиси муаззами Ҳизби халқии Демократии Тоҷикистон муҳтарам Эмомалӣ Раҳмон ба таҳкими нақши занон дар ҷомеа, махсусан дар арсаи сиёсӣ, аҳаммияти хоса зоҳир мегардад.
Қайд шуд, ки мақсад аз баргузории ҳамоиш баррасии масъалаҳо вобаста ба нақш ва саҳми занон дар раванди сиёсии кишвар, таҳким ва густариши демократия, баланд бардоштани мавқеи занон дар идоракунии давлатӣ, омода намудани занону духтарони лаёқатманд ҳамчун чеҳраи муваффақи сиёсӣ ва сиёсатмадори сатҳи байналмилалӣ мебошад.
Ҳамоиши мазкур минбаре барои мубодилаи таҷриба, таҳлили мушкилот ва дарёфти роҳҳои нав барои густариши ҳузури занон дар сиёсату идоракунӣ буда, ба пешрафти ҷомеа ва таҳкими нақши занон дар давлатдорӣ, рушди ақидаю иқдомҳои созанда ва мустаҳкам намудани ҳамкориҳо дар ҳамаи самтҳо мусоидат хоҳад кард.
Дар интиҳои ҳамоиш як чанд нафар аъзои фаъоли ҲХДТ бо медалҳои ҷашнӣ ва Сипосномаи ҲХДТ мукофотонида шуданд.
Вакилзанон аз бинои нави Парламенти кишвар боздид ба амал оварданд.