Имрӯз Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо Раиси Жогорку Кенеши (Парламенти) Ҷумҳурии Қирғизистон Нурланбек Тургунбек уулу мулоқот намуд.
Зимни мулоқот қайд гардид, ки Маҷлиси намояндагони Маҷлиси Олии Ҷумҳурии Тоҷикистон бо беш аз 70 парламентҳои кишварҳои олам ҳамкорӣ дорад. Дар ин замина ба густариши робитаҳои байнипарламентӣ ба ҳамсояи наздиктаринамон –Ҷумҳурии Қирғизистон таваҷҷуҳи хоса дода мешавад, - гуфт Файзалӣ Идизода.
Боиси қаноатмандист, ки муносибатҳои байнипарламентии кишварҳоямон, ки ба усулҳои дӯстӣ ва ҳамсоягии нек асос ёфтаанд, солҳои охир бо дарназардошти манфиатҳои ду ҷониб, густариш меёбанд.
Маҳз ҷаҳду талошҳои Президенти Ҷумҳурии Тоҷикистон - Пешвои муаззами миллат муҳтарам Эмомалӣ Раҳмон ва Президенти Қирғизистон муҳтарам Садир Жапаров буд, ки сулҳи абадӣ миёни халқҳоямон танинандоз гашта, орзуи деринаи халқҳоямон амалӣ шуд.
Мо ҷонибдори рушду густариши муносибатҳои байнипарламентӣ бо парламенти Ҷумҳурии Қирғизистон (Жогорку Кенеш) мебошем. Табодули таҷрибаи байнипарламентӣ дар фаъолияти қонунгузорӣ ва таҳкиму тавсеа додани фаъолияти гурӯҳҳои дӯстӣ ва ҳамкорӣ имкон фароҳам меоваранд, ки мувоффақияту дастовардҳои бештар ба даст орем.
Маҷлиси намояндагон тибқи Конститутсияи Ҷумҳурии Тоҷикистон мақоми олии намояндагӣ ва қонунгузор мебошад.
Бисёр корҳо аз қарорҳои қабулкардаи мо, аз ҷумла ба амалӣ гардондани мақсаду вазифаҳои стратегӣ, программавии давлати мо вобаста аст.
Кори парламентӣ, воқеан, ба рушди робитаҳои ҷамъиятӣ такони ҷиддӣ мебахшад, ба густариши ҳамкориҳои дуҷонибаи Тоҷикистон ва дигар давлатҳо мусоидат мекунад. Дар ин бобат Қирғизистон низ истисно нест.
Мо тамоми қувваро ба кор мебарем, ки ҳамаи он вазифахоеро, ки роҳбарони давлатхо ва халқҳоямон дар наздамон гузоштаанд, дар амал татбиқ намоем, -гуфт Файзалӣ Идизода.
Рушду тавсеаи муносибатҳои байнипарламентӣ дар заминаи механизмҳои ҳамкориҳои байналмилалӣ, бахусус дар чаҳорчӯби Созмони Милали Муттаҳид, Созмони Ҳамкории Шанхай, Иттиҳоди байнипарламентӣ, Ассамблеяи байнипарламентии Иттиҳоди Давлатҳои Мустақил, Шурои парламентии кишварҳои Осиё ва Африқо ва ғайра муҳим арзёбӣ гардид.