Имрӯз таҳти раёсати муовини Раиси Маҷлиси намояндагони Маҷлиси Олии Ҷумҳурии Тоҷикистон, роҳбари кумитаи ҳамкории парламентии Ҷумҳурии Тоҷикистон – Иттиҳоди Аврупо Муинӣ Мавсума ҷаласаи 12-уми Кумитаи ҳамкории парламентии Ҷумҳурии Тоҷикистон ва Иттиҳоди Аврупо дар шаҳри Душанбе доир шуд, ки дар он ҳайати Парламенти Иттиҳоди Аврупо оид ба равобит бо Осиёи Марказӣ ва Муғулистон бо роҳбарии хонум Ҷузеппина Принчи иштирок намуданд.
Мавсума Муинӣ зимни суханронӣ қайд намуд, ки Пешвои миллат- Президенти Ҷумҳурии Тоҷикистон муҳтарам Эмомалӣ Раҳмон пайваста ба тавсеаи ҳамкориҳои ҳамаҷониба бо Иттиҳоди Аврупо аҳаммияти махсус зоҳир менамоянд. Тоҷикистон Иттиҳоди Аврупоро шарики муҳимми байналмилалии худ дониста, нақши онро барои мусоидат ба таҳаввулоти демократӣ дар кишвар, ҷалби сармояи хориҷӣ ба соҳаҳои афзалиятноки иқтисоди миллӣ, рушди иҷтимоӣ, ҳифзи муҳити зист дониста саъй мекунад, ки ҳамкориҳои дарозмуддат ва устуворро дар асоси принсипҳои мутақобила муфид инкишоф диҳад.
Дар ҷаласа, роҳбари ҳайати вакилони Парламенти Иттиҳоди Аврупо хонум Ҷузеппина Принчи, инчунин, узви Кумитаи ҳамкории парламентии Тоҷикистону – Аврупо, раиси Кумитаи Маҷлиси намояндагони Маҷлиси Олии Ҷумҳурии Тоҷикистон оид ба корҳои байналмилалӣ, иттиҳодияҳои ҷамъиятӣ ва иттилоот Гулзода Маҳмадшоҳ, раиси Кумита оид ба иқтисод ва молия Ашӯрзода Ғиёсиддин, раиси Кумита оид ба масъалаҳои иҷтимоӣ, оила ва ҳифзи саломатӣ Ҷавҳарӣ Муҷибахон, узви Кумитаи ҳамкорӣ, раиси Кумита оид ба тартиботи ҳуқуқӣ, амният ва мудофиа Маҳмудзода Насрулло, узви Кумитаи ҳамкорӣ, Раиси Кумита оид ба қонунгузорӣ ва ҳуқуқи инсон Шоҳмурод Рустам, узви кумитаи ҳамкорӣ, раиси Комиссияи экологӣ Амирзода Ориф, муовини раиси Кумита оид ба энергетика, саноат, сохтмон ва коммуникатсия Саидзода Фирдавс ба сухан баромада, оид ба вазъи кунунӣ ва дурнамои ҳамкории Ҷумҳурии Тоҷикистон - Иттиҳоди Аврупо, инчунин, доир ба созишномаи тавсеаи шарикӣ ва ҳамкорӣ, робитаҳои иқтисодию тиҷоратии Иттиҳоди Аврупо ва Тоҷикистон, робитаҳои иҷтимоию фарҳангӣ, ҳифзи муҳити зист, энергетика ва дигар масъалаҳои муҳим андешаҳои худро гуфтанд.
Қайд шуд, ки муҳокимарониҳои имрӯзa далели равшани рушди босубот ва мутақобилан судманди муносибатҳои Ҷумҳурии Тоҷикистон ва Иттиҳоди Аврупо мебошад. Аз ин бармеояд, ки ҳамкориҳои сиёсӣ, иқтисодӣ,
иҷтимоӣ ва фарҳангии ду ҷониб сол то сол таҳким ёфта, воқеан ба манфиати мардумони мо равона гардидаанд.
Шарикии Тоҷикистон ва Иттиҳоди Аврупо дорои дурнамои равшан буда, дар асоси манфиатҳои муштарак ва ҳадафҳои созанда дар оянда боз ҳам қавитар хоҳад шуд. Доир ба масъалаҳои баррасишуда, қарорҳои дахлдор қабул шуд.
Баъд аз анҷоми ҷаласа ҳайати меҳмонон аз бинои нави Парламенти Тоҷикистон дидан намуданд.
Ёдовар мешавем, ки ташрифи ҳайати меҳмонон то рӯзи 18-уми сентябр дар кишварамон идома ёфта, саёҳат ба мавзеъҳои дилнишини кишвар ва боздид аз НБО Роғун дар назар аст.