Имрӯз ҷавондухтарон - шунавандагони мактаби САҲА оид ба дипломатия, роҳбарӣ ва сулҳоварӣ аз бинои нави Парламенти Тоҷикистон боздид ба амал оварда, таасуроти нек бардоштанд.
Бояд зикр намуд, ки тибқи дархости роҳбарияти Дафтари Барномаҳои САҲА дар Тоҷикистон соли равон дар назди муовини Раиси Маҷлиси намояндагони Маҷлиси Олии Ҷумҳурии Тоҷикистон бо мақсади таҳкими нақши занон дар ҳаёти сиёсиву иҷтимоии кишвар ва иштироки фаъолонаи вакилзанон дар ҳамоишу чорабиниҳои мухталиф доир ба масъалаҳои гендерӣ, солимии занону бонувон, таҳияву такмили қонунгузорӣ, баланд бардоштани мақоми занон дар ҷомеа, аз ҳисоби вакилон ва кормандони Дастгоҳи Маҷлиси намояндагон гурӯҳи кории доимоамалкунанда оид ба фаъолияти “Иттиҳоди занони Маҷлиси намояндагони Маҷлиси Олии Ҷумҳурии Тоҷикистон” созмон дода шудааст.
Созмон додани иттиҳоди мазкур имкон фароҳам меорад, ки ҳамкориҳо бо вакилзанони парламентҳои дигар кишварҳо ҷиҳати мубодилаи таҷриба дар самти фаъолияти қонунгузорӣ ва ҷалби бонувон ба ҳаёти иҷтимоиву сиёсӣ беҳтар гардад.
Дар рафти боздид бо ҷавондухтарон - шунавандагони мактаби САҲА дар Тоҷикистон раиси Кумита оид ба масъалаҳои иҷтимоӣ, оила ва ҳифзи саломатӣ Муҷибахон Ҷавҳарӣ, муовини раиси Кумита оид ба корҳои байналмилалӣ, иттиҳодияҳои ҷамъиятӣ ва иттилоот Сурайё Дӯстмуродзода, узви Кумита оид ба энергетика, саноат, сохтмон ва коммуникатсия Дилафрӯз Саидӣ ва узви Кумита оид ба қонунгузорӣ ва ҳуқуқи инсон Наима Солизода суҳбату мулоқот анҷом доданд.