Имрӯз Раиси Маҷлиси намояндагони Маҷлиси Олии Ҷумҳурии Тоҷикистон Ф. Идизода Сафири фавқулодда ва мухтори Ҷумҳурии Ҳиндустон дар Ҷумҳурии Тоҷикистон ҷаноби Раҷеш Укиро ба ҳузур пазируфт. Дар мулоқот зикр гардид, ки Ҷумҳурии Ҳиндустон аз соли 1992 бо…
Имрӯз Раиси Маҷлиси намояндагони Маҷлиси Олии Ҷумҳурии Тоҷикистон Ф. Идизода Сафири фавқулодда ва мухтори Ҷумҳурии Ҳиндустон дар Ҷумҳурии Тоҷикистон ҷаноби Раҷеш Укиро ба ҳузур пазируфт.
Дар мулоқот зикр гардид, ки Ҷумҳурии Ҳиндустон аз соли 1992 бо Ҷумҳурии Тоҷикистон робитаҳои дипломатӣ барқарор намудааст. Ҳамкориҳои гуногунҷанбаи Тоҷикистону Ҳиндустон солҳои охир бо ташаббусҳои созандаи роҳбарияти олии кишварҳоямон, Президенти Ҷумҳурии Тоҷикистон - Пешвои миллат муҳтарам Эмомалӣ Раҳмон ва Сарвазири Ҷумҳурии Ҳиндустон муҳтарам Нарендра Моди батадриҷ вусъат меёбанд.
Ҳамкориҳои дуҷониба дар соҳаҳои сиёсӣ, иқтисодӣ, тиҷоратӣ, сармоягузорӣ, иҷтимоӣ, тандурустӣ, фарҳангӣ, гуманитарӣ, ҳарбӣ ва амниятӣ дар ҳолати рушд қарор доранд.
Ёдовар мешавем, ки дар ин робита Эъломия дар бораи принсипҳо ва самтҳои ҳамкорӣ байни Ҷумҳурии Тоҷикистон ва Ҷумҳурии Ҳиндустон, ки 15 феврали соли 1993 дар шаҳри Ню Дели ба тасвиб расида буд, аҳаммияти муҳим дорад.
Заминаи ҳуқуқии ҳамкориҳои кишварҳоямонро зиёда аз 74 санади ҳуқуқӣ дар бар мегирад.
Ба рушди муносибатҳои дуҷониба анҷом додани сафарҳои давлатӣ, расмӣ ва кории роҳбарияти олӣ, вохӯриҳо дар ҳошияҳои ташкилоту созмонҳои бонуфузи байналмилалӣ (СММ, СҲШ, Иттиҳоди байнипарламентӣ), бахусус дар платформаи муколамаи “Осиёи Марказӣ-Ҳиндустон” вусъати тоза мебахшанд.
Изҳори боварӣ карда шуд, ки муносибатҳои байнипарламентӣ минбаъд низ рушд ёфта, дар арсаҳои гуногуни фаъолият, аз ҷумла қонунгузорӣ таҳким меёбанд.
Маҷлиси намояндагон хоҳони густариши устувори ҳамкориҳо бо Лок Сабҳаи Ҳиндустон дар сатҳи дуҷониба ва бисёрҷонибаи байналмилалӣ, аз ҷумла дар ҳошияи фаъолияти Иттиҳоди байнипарламентӣ буда, муколама, мубодилаи сафарҳои расмии ҳайати гурўҳҳои дустӣ ва ҳамкориҳои байнипарламентиро ба роҳ монда, ҷиҳати ба пешравиҳо ноил гардидан талошҳои муштаракро ба харҷ хоҳад дод.