Имрӯз Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо Сафири Ҷумҳурии Исломии Эрон ҷаноби Алиризо Ҳақиқиён мулоқот намуданд. Зимни вохӯрӣ қайд гардид, ки Ҷумҳурии Исломии Эрон аз аввалин кишварҳое мебошад, ки Тоҷикистонро ҳамчун давлати соҳибихтиёр ва мустақил эътироф намуда, ба расмият шинохт ва 9 январи соли 1992 робитаҳои дипломатӣ байни кишварҳоямон барқарор гардид.
Мардумони Тоҷикистон ва Эронро решаҳои амиқи таърихӣ, забон, фарҳанг ва тамаддуни муштарак мепайванданд.
Зикр гардид, ки бо ташаббусҳои созандаи роҳбарияти олии кишварҳоямон, Президенти Ҷумҳурии Тоҷикистон - Пешвои миллат муҳтарам Эмомалӣ Раҳмон ва Президенти Ҷумҳурии Исломии Эрон муҳтарам Масъуд Пизишкиён муносибатҳои дуҷониба ва бисёрҷониба байни кишварҳоямон рушду густариш ёфта истодаанд.
Асосҳои ҳуқуқии ҳамкориҳо байни Тоҷикистону Эрон давоми 33 сол хеле мустаҳкам гардида, имрӯзҳо зиёда аз 240 ҳуҷҷат ва санадҳои байналмилалиро ташкил медиҳанд.
Ҳамкориҳои байни Тоҷикистону Эрон дар соҳаҳои гуногуни сиёсӣ, иқтисодӣ, тиҷоратӣ, амният, фарҳангиву гуманитарӣ чашмрас мебошанд.
Солҳои охир ҳамкориҳои гуногунҷабҳаи байналмилалӣ ва тавсеаи бесобиқаи робитаҳои дуҷониба, аз ҷумла робитаҳои байнипарламентӣ байни Тоҷикистону Эрон низ ба назар мерасад, ки боиси қаноатмандӣ аст.
Фаъолияти гурӯҳҳои дӯстӣ ва ҳамкории Маҷлиси намояндагон бо Шурои исломии Ҷумҳурии Исломии Эрон муҳим арзёбӣ гардид. Табодули таҷрибаи вакилони ҳар ду кишвар ба пешрафти фаъолияти қонунгузорӣ метавонад мусоидат намояд.
Маҷлиси намояндагон хоҳони густариши устувори ҳамкориҳо бо Шурои исломии Ҷумҳурии Исломии Эрон буда, ҷиҳати ба пешравиҳо ноил гардидан дар ҳамаи соҳаҳо ҷаҳду талош хоҳад кард.