19 майи соли 2026 дар бинои Прокуратураи генералии Ҷумҳурии Тоҷикистон мулоқоти Прокурори генералӣ, Воҳидзода Ҳ.С. бо Роҳбари Маркази минтақавии СММ оид ба дипломатияи боздоранда барои Осиёи Марказӣ Каха Имнадзе баргузор гардид.
Зимни мулоқот дурнамои ҳамкориҳо дар самти таъмини амнияти минтақавӣ мавриди баррасӣ қарор дода шуда, ба масъалаҳои муқовимат ба чолишҳо ва таҳдидҳои муосири ҷаҳонӣ, аз ҷумла терроризми байналмилалӣ ва экстремизм таваҷҷуҳи хоса зоҳир гардид.
Аз ҷониби Прокурори генералии Ҷумҳурии Тоҷикистон Воҳидзода Ҳ.С. ба роҳбари Маркази минтақавӣ оид ба рафти амалишавии Стратегияи миллии Ҷумҳурии Тоҷикистон оид ба муқовимат ба экстремизм ва терроризм барои давраи то соли 2040 маълумот дода шуд.
Қайд гардид, ки ҳуҷҷати стратегии мазкур нақши калидии мақомоти прокуратураро дар ҳамоҳангсозии ҳамкориҳои байниидоравӣ ва байналмилалӣ ҷиҳати иҷрои вазифаҳои гузошташуда мустаҳкам менамояд.
Дар навбати худ Каха Имнадзе барои пазироии самимӣ миннатдории худро изҳор намуда, қайд кард, ки айни замон Осиёи Марказӣ ҳамчун субъекти муҳими дипломатияи боздоранда фаъолона мавқеъи худро дар арсаи ҷаҳони мустаҳкам намуда истодааст. Дар ин ҷода саҳми назарраси Ҷумҳурии Тоҷикистон низ дар нигоҳ доштани суботу амният дар минтақаи Осиёи Марказӣ таъкид гардид.Алалхусус аз ҷониби роҳбари Маркази минтақавӣ сиёсати хирадмандонаи Асосгузори сулҳу вахдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар танзими масъалаҳои байни сарҳадӣ, хусусан оид ба делимитатсия ва демаркатсияи сарҳади давлатӣ бо Ҷумҳурии Қирғизистон ва имзои Декларатсияи Хуҷанд махсусан қайд карда шуд.
Инчунин, Каха Имнадзе ба «Раванди Душанбе», ки ба як платформаи бонуфузи байналмилалӣ барои муттаҳид сохтани талошҳои ҷомеаи ҷаҳонӣ ва мубодилаи таҷриба дар самти мубориза бо терроризм табдил ёфтааст, баҳои баланд дод.
Дар охир дарҷ гардид, ки Маркази минтақавии дипломатияи боздоранда омодааст барои рушди минбаъдаи шарикӣ дар самтҳои афзалиятноки дорои таваҷҷуҳи муштарак, аз ҷумла дар масъалаҳои мустаҳкам намудани сарҳади давлатӣ ва ҳалли масъалаҳои вобаста ба он ҳамкориҳоро ба роҳ монад.
Мулоқот дар фазои созанда ва дӯстона баргузор гардид.
