10 июни соли 2026 таҳти ҳамраисии муовини вазири рушди иқтисод ва савдои Ҷумҳурии Тоҷикистон Нуриддинзода Аҳлиддин Нуриддин ва муовини вазири савдо ва саноати Ҷумҳурии Ҳиндустон Раҷеш Агравал ҷаласаи 12-уми Комиссияи муштараки байниҳукуматии Тоҷикистону Ҳиндустон оид ба ҳамкориҳои тиҷоратӣ, иқтисодӣ, илмӣ ва техникӣ дар шакли маҷозӣ баргузор гардид.
Зимни ҷаласа ҷонибҳо рушди муносибатҳои дӯстона ва ҳамкориҳои мутақобилан судманди Тоҷикистону Ҳиндустонро таъкид намуда, изҳор доштанд, ки ба шарофати сиёсати хирадмандона ва дурандешонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Сарвазири Ҷумҳурии Ҳиндустон муҳтарам Нарендра Модӣ муносибатҳои ду кишвар пайваста таҳким меёбанд.
Комиссияи муштараки байниҳукуматӣ ҳамчун механизми муҳими тавсеаи ҳамкориҳои тиҷоратию иқтисодӣ ва пешбурди робитаҳои амалии ду кишвар арзёбӣ гардида, дар рафти ҷаласа масъалаҳои густариши ҳамкориҳо дар соҳаҳои тиҷорат ва сармоягузорӣ, кишоварзӣ ва амнияти озуқаворӣ, тандурустӣ ва дорусозӣ, энергетика, саноат, технологияҳои рақамӣ ва инноватсия, сайёҳӣ, меҳнат ва ҳифзи иҷтимоӣ, нақлиёт, инчунин бонкдорӣ ва суғурта мавриди баррасӣ қарор гирифта, ба рушди ҳамкориҳои саноатӣ, татбиқи лоиҳаҳои муштарак дар самти энергияи барқароршаванда, рақамикунонии иқтисод ва таҳкими робитаҳои соҳибкорӣ таваҷҷуҳи махсус зоҳир гардид.
Дар анҷоми ҷаласа ҷонибҳо омодагии худро ҷиҳати татбиқи мувофиқаҳои бадастомада ва идомаи ҳамкориҳои мутақобилан судманд миёни Ҷумҳурии Тоҷикистон ва Ҷумҳурии Ҳиндустон тасдиқ намуданд.
