1 апрели соли 2026 дар Вазорати рушди иқтисод ва савдои Ҷумҳурии Тоҷикистон бо иштироки роҳбарияти вазорат, намояндаи Агентии назорати давлатии молиявӣ ва мубориза бо коррупсия ва кормандони дастгоҳи марказӣ вохӯрӣ ва мусоҳиба вобаста ба масъалаи арзёбии дохилиидоравии зиддикоррупсионии лоиҳаҳои санадҳои меъёрии ҳуқуқӣ баргузор гардид.
Ҷаласаро муовини вазири рушди иқтисод ва савдо Восидиён Фарҳод Саъдулло оғоз намуда, таъкид кард, ки муқовимат ба коррупсия яке аз самтҳои муҳими сиёсати давлатӣ буда, вазифаи ҳар як шаҳрванди кишвар, махсусан хизматчиёни давлатӣ, ба ҳисоб меравад. Зикр гардид, ки таҳкими механизми пешгирии хавфҳои коррупсионӣ ҳангоми таҳияи санадҳои меъёрии ҳуқуқӣ аз ҷумлаи самтҳои афзалиятноки фаъолияти вазорат мебошад.
Дар ҷараёни чорабинӣ сарнозири Раёсати экспертизаи давлатии зиддикоррупсионии санадҳои меъёрии ҳуқуқии Агентии назорати давлатии молиявӣ ва мубориза бо коррупсия Азамзода Шаҳром бо кормандони дастгоҳи марказии вазорат суҳбат ва корҳои фаҳмондадиҳӣ анҷом дода, оид ба муҳиммияти гузаронидани экспертизаи зиддикоррупсионӣ, ошкор ва пешгирии омилҳои коррупсионӣ дар лоиҳаҳои санадҳои меъёрии ҳуқуқӣ маълумоти муфассал пешниҳод намуд.
Ҳамчунин дар ҷаласа масъалаҳои марбут ба баланд бардоштани сифати таҳияи санадҳои меъёрии ҳуқуқӣ, таъмини шаффофият ва пешгирии эҳтимолияти хатарҳои коррупсионӣ мавриди баррасӣ қарор гирифтанд.
