17 марти соли 2026 таҳти роҳбарии муовини вазири рушди иқтисод ва савдои Ҷумҳурии Тоҷикистон Нуриддинзода Аҳлиддин Нуриддин ва котиби иловагии вазорати тиҷорати Ҷумҳурии Исломии Покистон Носир Ҳомид ҷаласаи сеюми Гурӯҳи кории муштараки Тоҷикистону Покистон оид ба савдо, сармоягузорӣ ва нақлиёт дар шакли маҷозӣ баргузор гардид.
Дар ҷаласа намояндагони вазорату идораҳои дахлдори ҳарду кишвар иштирок намуда, масъалаҳои муҳимми ҳамкориҳои иқтисодиро мавриди баррасӣ қарор доданд.
Дар доираи ҷаласа ҷонибҳо масъалаи стратегии татбиқ ва фаъолсозии долони нақлиёти автомобилӣ, афзоиши гардиши савдои дуҷониба ва дар ин замина таҳия ва тасдиқ намудани харитаи роҳ, роҳандозии ҳамкории саноатӣ, аз ҷумла таъсиси корхонаҳои нассоҷӣ ва фарматсевтикиро муҳокима намуданд.
Дар анҷоми ҷаласа ҷонибҳо аз сатҳи муносибатҳои дӯстона изҳори қаноатмандӣ намуда, таъкид карданд, ки натиҷаҳои ин нишаст ба густариши минбаъдаи ҳамкориҳои тиҷоративу сармоягузории байни ду кишвар такони ҷиддӣ хоҳад бахшид.
