23 октябри соли 2025 дар Вазорати рушди иқтисод ва савдо семинари омӯзишӣ оид ба муқаррароти Кодекси андоз, рақамикунонии соҳа ва татбиқи хизматрасониҳои давлатии мақомоти андоз дар шакли электронӣ бо иштироки намояндагони вазорат ва Кумитаи андоз баргузор гардид.
Тавре Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми худ ба Маҷлиси Олии Ҷумҳурии Тоҷикистон қайд намуданд “Ташаккул додани маърифати молиявии шаҳрвандон ва баланд бардоштани фарҳанги андозсупорӣ ҳамчун яке аз омилҳои асосии татбиқи самараноки сиёсати андозу буҷет, аз ҷумла дар масъалаи гузариш ба низоми пардохтҳои ғайринақдӣ барои ноил гардидан ба устувории молиявии давлат ва рушди иқтисодӣ нақши муҳим дорад.”
Дар робита ба ин Муовини вазири рушди иқтисод ва савдо Восидиён Фарҳод Саъдулло қайд намуд, ки баргузор намудани семинари мазкур саривақтӣ буда, ба татбиқ намудани Фармони Президенти Ҷумҳурии Тоҷикистон “Дар бораи “Солҳои рушди иқтисоди рақамӣ ва инноватсия” эълон намудани солҳои 2025-2030” мусоидат мекунад.
Сипас Муовини раиси Кумитаи андоз Маликзода Нарзулло Саидмумин дар бораи дастовардҳо ва самтҳои афзалиятноки рушди низоми андозбандӣ, махсусан дар заминаи рақамикунонии хизматрасониҳо сухан гуфта, рӯнамои муфассалро оид ба механизмҳои татбиқи Кодекси андоз, бартариҳои системаи электронии пардохт ва пешниҳоди ҳисоботҳо, ҳамчунин нақши рақамикунонӣ дар беҳтарсозии муносибатҳои байни давлат ва андозсупорандагон пешниҳод намуд.
Дар қисмати саволу ҷавоб, иштирокчиён андешаҳои худро иброз намуда, саволҳои марбут ба татбиқи муқаррароти Кодекси андоз ва имкониятҳои минбаъдаи ҳамкории байни ниҳодҳои давлатӣ мавриди муҳокима қарор доданд.
