16 сентябри соли 2025 Вазири рушди иқтисод ва савдо Завқизода Завқӣ Амин бо намояндаи доимии ХБА дар Ҷумҳурии Тоҷикистон ҷаноби Ғазӣ Шбайкат вохӯрӣ намуда, ӯро ба муносибати ба вазифаи намояндаи доимии ХБА дар Ҷумҳурии Тоҷикистон таъин шуданаш табрик карда, ба ӯ муваффақиятҳо таманно намуд.
Қайд гардид, ки дар натиҷаи вохӯриҳои сатҳи баланд Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Директори идоракунандаи ХБА хонум Кристалина Георгиева муносибатҳои дуҷониба ба сатҳи баланд баромаданд.
Завқизода З. А. қайд кард, ки дар моҳҳои январ-августи соли 2025 новобаста аз вазъи мураккаби иқтисоди ҷаҳон дар натиҷаи иҷрои дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, Ҳукумати Ҷумҳурии Тоҷикистон, инчунин татбиқи саривақтии ҳадафҳои стратегии кишвар, қабули қарорҳои дахлдори Ҳукумати ҷумҳурӣ, барномаву стратегияҳо рушди иқтисоди миллӣ таъмин гардид.
Аз ҷумла қайд гардид, ки новобаста аз таъсири омилҳои берунӣ дар давоми панҷ соли охир рушди миёнаи ММД дар кишвар зиёда аз 8 фоизро ташкил намуда, ҳаҷми номиналии он дар соли 2025 тибқи баҳодиҳӣ ба 173,4 млрд. сомонӣ баробар мегардад, ки нисбат ба соли 2020 2 маротиба зиёд мебошад.
Инчунин тибқи қарори Ҳукумати Ҷумҳурии Тоҷикистон аз 1 июли соли 2025, №377 рушди иқтисоди миллӣ дар солҳои 2026, 2027 ва 2028 мутаносибан дар сатҳи 8,5, 8,3 ва 8,6 фоизӣ пешбинӣ гардидааст.
Бо назардошти тамоюли рушди иқтисоди миллӣ дар соли ҷорӣ ХБА суръати рушди иқтисоди миллии кишварро дар соли 2025 бозбинӣ карда дар сатҳи 7 фоиз баҳодиҳӣ намуд.
Дар анҷоми вохӯрӣ ҷонибҳо бо мақсади ноил гардидан ба ҳадафу афзалиятҳои рушди кишвар омодагии худро барои густариши минбаъдаи ҳамкориҳои мутақобилан судманд, бахусус дар самтҳои рушди соҳаҳои иқтисоди миллӣ, низоми дурнамосозӣ, расмикунонии иқтисоди пинҳонӣ, ҳамзамон татбиқи ислоҳоти сохторӣ изҳор намуданд.
