25 август дар Вазорати корҳои хориҷии Ҷумҳурии Тоҷикистон ба муносибати 35-солагии Истиқлолияти давлатии Ҷумҳурии Тоҷикистон Конфронси байналмилалӣ таҳти унвони «Тоҷикистон ва 35 соли соҳибистиқлолӣ: таҷрибаи сулҳофарӣ, сиёсати бисёрсамта ва рушди устувор» бо иштироки намояндагони воломақом аз Ҳукумат ва Парлумони Ҷумҳурии Тоҷикистон, роҳбарони вазорату идораҳои давлатӣ, корпуси дипломатӣ, инчунин ходимони сиёсӣ, собиқадорони хизмати дипломатӣ ва сафоратхонаҳои кишвар дар хориҷа ба таври маҷозӣ баргузор гардид.
Дар қисмати ифтитоҳии Конфронс муовини Раиси Маҷлиси намояндагони Маҷлиси Олии Ҷумҳурии Тоҷикистон Мавсума Муинӣ ба сухан баромада, иброз намуд, ки нақши Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамчун меъмори сиёсати хориҷии Тоҷикистони соҳибистиқлол маънои воқеии худро пайдо намудааст. Дипломатияи Тоҷикистон имрӯз дигар танҳо дар ҳалли масъалаҳои минтақавӣ маҳдуд намемонад. Агар солҳои аввали истиқлолият масъалаҳои асосӣ сулҳ, амният ва эҳёи давлат буданд, имрӯз Тоҷикистон ба кишваре табдил ёфтааст, ки масъалаҳои умумибашариро ба рӯзномаи байналмилалӣ ворид мекунад.
Бузургтарин намунаи ҳамин таҳаввул ташаббусҳои ҷаҳонӣ дар масъалаи об мебошанд. Аз Соли байналмилалии оби тоза то Даҳсолаи «Об барои ҳаёт», аз Даҳсолаи «Об барои рушди устувор» то Конфронсҳои сатҳи баланди Душанбе оид ба об - ҳамаи ин нишон медиҳад, ки Тоҷикистон тавонист масъалаеро, ки аз ҷуғрофиёи худ сарчашма мегирад, ба масъалаи тамоми башарият табдил диҳад.
Имрӯз масъалаи ҳифзи пиряхҳо низ ба ҳамин силсила дохил мешавад. Ташаббусҳои байналмилалии Тоҷикистон дар ин самт ва баргузории чорабиниҳои ҷаҳонӣ дар Душанбе нишон медиҳанд, ки кишвар аз мавқеи қабулкунандаи қарорҳо ба мавқеи ташаббускори рӯзномаи байналмилалӣ гузаштааст.
М.Муинӣ таъкид намуд, ки дар ҷаҳони имрӯз парламентҳо ба яке аз муҳимтарин майдонҳои муколама, эҷоди эътимод ва таҳкими муносибатҳои байнидавлатӣ табдил ёфтаанд. Маҳз ҳамин хусусият дипломатияи парламентиро ба яке аз воситаҳои муҳимми сиёсати хориҷии муосир табдил додааст.
Сипас, конфронс дар бахшҳои мавзуии он, ки таҳти унвони: «Ҳамкории мақомоти давлатӣ, ҷомеаи илмӣ ва корпуси дипломатӣ дар пешбурди сиёсати хориҷӣ» ва «Занҳо пайрави сиёсати устувори дохиливу хориҷии Пешвои миллат» баргузор шуданд, дастовардҳои Ҷумҳурии Тоҷикистон дар тули 35 соли истиқлоли давлатӣ ва дурнамои пешрафти кишвар мавриди таҳлилу баррасӣ қарор гирифтанд.
Дар кори ҳамоиши байналмилалӣ беш аз 200 нафар иштирок намуда, ҷараёни он тариқи 50 расонаи иттилоотии дохилӣ ва хориҷӣ инъикос гардид.
