5 октябри соли 2026, дар шаҳри Душанбе дар заминаи ҳамкориҳои Маҷлиси намояндагони Маҷлиси Олии Ҷумҳурии Тоҷикистон бо Дафтари барномаҳои САҲА дар Душанбе маросими ифтитоҳи курси 2-юми Мактаби Созмони Амният ва ҳамкорӣ дар Аврупо (САҲА) оид ба дипломатия, роҳбарӣ ва сулҳоварӣ барои ҷавондухтарон, барои беш аз 20 нафар занону бонувон аз тамоми гушаву канори Тоҷикистон баргузор гардид, ки дар кори он Мавсума Муинӣ - муовини Раиси Маҷлиси намояндагони Маҷлиси Олии Ҷумҳурии Тоҷикистон, ҷаноби Фейзо Нуманаӣ, иҷрокунандаи Роҳбари Дафтари барномаҳои САҲА дар Душанбе, хонум Парвати Рамасвами, Ҳамоҳангсози доимии Созмони Милали Муттаҳид дар Тоҷикистон, хонум Кэтрин Смитто, сафири Британияи Кабир ва Ирландияи Шимолӣ дар Душанбе ва дигар шахсони расмии мақомоти иҷроия иштирок ва суханронӣ намуданд.
Зимни суханронӣ Мавсума Муинӣ, муовини Раиси Маҷлиси намояндагони Маҷлиси Олии Ҷумҳурии Тоҷикистон зикр намуд, ки ҳанӯз аз рӯзҳои нахустини соҳибихтиёрӣ мақом ва саҳми Роҳбари оқилу дурандеши мо муҳтарам Эмомалӣ Раҳмон дар роҳандозиву барқарорнамоии робитаҳои дӯстонаву дипломатӣ бо кишварҳои гуногун, созмону ташкилотҳои байналмилалӣ ва муаррифии кишвару миллат дар арсаи ҷаҳон беназиру бемисл аст.
Баъди соҳибистиқлолии Ҷумҳурии Тоҷикистон марҳилаи нави давлатсозӣ, таҳкими ниҳодҳои демократӣ ва густариши муносибатҳои байналмилалӣ оғоз гардид. Дар тули солҳои истиқлолият Тоҷикистон ба шарофати сиёсати мутавозин ва муносиб бо ҷаҳони имрӯз дар анҷумани давлатҳои мутамаддин мақом ва манзалати шоистаеро дар арсаи ҷаҳони муосир касб намуд.
Дар муддати 35 соли охир мақомоти олии намояндагии ҳокимияти давлатии Тоҷикистон ҳам ба сифати Шӯрои Олӣ, Маҷлиси Олӣ ва ҳам Маҷлиси намояндагони Маҷлиси Олӣ саъйу талошҳои зиёдеро ба хотири ташкил ва татбиқи низоми робитаҳои ҳамкориҳои байнипарламетӣ бо кишварҳо ва созмонҳои бузурги байналмилалию минтақавӣ роҳандозӣ намудааст.
Мавқеъ ва саҳми занон дар дипломатияи парламентии Ҷумҳурии Тоҷикистон яке аз масъалаҳои муҳим ва қобили таҳқиқ мебошад.
Занони Тоҷикистон дар солҳои соҳибистиқлолӣ дар ҳаёти сиёсӣ, иҷтимоӣ ва ҷамъиятии кишвар фаъолона иштирок намуда, дар баробари мардон дар таҳкими пояҳои давлатдорӣ, рушди парламентаризм, густариши робитаҳои байналмилалӣ, таҳкими сулҳу суботи сиёсӣ нақши назаррас гузоштанд.
Пешвои миллат муҳтарам Эмомалӣ Раҳмон пайваста ба масъалаи иштироки занон дар ҳаёти сиёсӣ ва идоракунии давлатӣ таваҷҷуҳи махсус зоҳир намуда, барои ҷалби онҳо ба сохторҳои давлатӣ, аз ҷумла парламент ва дипломатия, заминаҳои мусоиди сиёсиву ҳуқуқӣ фароҳам оварданд. Бо дастгириҳои бевоситаи Пешвои миллат бонувони тоҷик тавонистанд дар арсаи дипломатияи парламентӣ ва муносибатҳои байналмилалӣ низ мавқеи шоиста касб намоянд.
Имрӯз занони тоҷик на танҳо дар таҳияи қонунҳо ва фаъолияти намояндагӣ, балки дар муаррифии давлат, ҳимояи манфиатҳои миллӣ ва таҳкими ҳамкориҳои байналмилалӣ низ саҳми назаррас доранд.
Фаъолияти курси Мактаби САҲА оид ба дипломатия, роҳбарӣ ва сулҳоварӣ барои ҷавондухтарон ва баргузор намудани мулоқоту муколама, омӯзиши малака ва донишҳои сиёсӣ миёни вакилони Маҷлиси намояндагони Маҷлиси Олии Ҷумҳурии Тоҷикистон бо шунавандагони мактаби мазкур иқдоми наҷибест дар мусоидат ҷиҳати роҳбарӣ ва иштироки занон дар ҳаёти ҷамъиятию сиёсӣ,
Дар ҳамоиши мазкур вакилон – Муродуллозода Дилноза, узви Кумита оид ба қонунгузорӣ ва ҳуқуқи инсон ва Аюбӣ Бибиосия, узви Кумитаи оид ба сохтори давлатӣ ва худидоракунии маҳаллӣ иштирок намуданд.
Курси мазкур то 10 октябри соли ҷорӣ идома ёфта, тибқи барнома боздиди шунавандагони он аз бинои нави Парламент ва лексия – суҳбат бо аъзои гуруҳи Иттиҳоди занони Маҷлиси намояндагони Маҷлиси Олии Ҷумҳурии Тоҷикистон, вакилони мардумӣ низ пешбинӣ гардидааст.
