Имрӯз беш аз 100 нафар духтарону шунавандагон ва омӯзгорони Маркази таълимии занон “Сарвар” дар иртибот ба муносибати таҷлили Рӯзи ҷавонони кишвар – 23 май ва татбиқи сиёсати давлатии ҷавонон, шиносоӣ аз фаъолияти мақомоти олии қонунгузор, баланд бардоштани маърифати ҳуқуқӣ, тарбияи ватандӯстӣ ва таҳкими ҳуввияти миллӣ дар ниҳоди ҷавонон, ҳимояи ҳуқуқ ва манфиатҳои насли ҷавон, иштироки фаъоли ҷавондухтарон дар ҳаёти сиёсӣ, иқтисодӣ ва иҷтимоии кишвар аз бинои нави Парламенти кишвар дидан намуданд. Ҳадафи дигари чорабинӣ, васеъ намудани ҷаҳонбинии ҷавондухтарон, ҳамчунин иштироки онҳо дар ҳамоишу чорабиниҳои мухталифи сатҳи милливу байналмилалӣ, таваҷҷуҳ ба масоили гендерӣ ва баланд бардоштани мақому иқтидори занону духтарон дар ҷомеа ва рушди сифатҳои роҳбарикунандаи онҳо дар заминаи ташаббусҳои Ҳукумати кишвар ва дастгириву ғамхориҳои ҳамешагии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбати занону духтарон ва имкониятҳои баробари амалигардонии ҳуқуқҳои онҳо дар даврони истиқлолият ва нақши калидии онҳо дар таҳкими сулҳу субот ва рушди устувори ҷомеа мебошад. Дар рафти боздид духтарону шунавандагон ва омӯзгорони Маркази таълимии занон “Сарвар” бо вакилзанони Маҷлиси намояндагон - муовини Раиси Маҷлиси намояндагони Маҷлиси Олии Ҷумҳурии Тоҷикистон Мавсума Муинӣ, муовини раиси Кумита оид ба қонунгузорӣ ва ҳуқуқи инсон Имомзода Нилуфар, узви Кумита оид ба иқтисод ва молия Исҳоқӣ Ҳусния ва узви Кумита оид ба илм, маориф, фарҳанг ва сиёсати ҷавонон Мусоҷонзода Ҷамила мулоқот намуда, роҷеъ ба самтҳои намояндагӣ, қонунгузорӣ ва байнипарламентии фаъолияти Маҷлиси намояндагон огаҳии бештар пайдо намуданд.
Ҳозирин аз мулоқот бо вакилбонувону боздиди бино, залҳо ва дафтарҳои кории зебову барҳаво таасуроти нек бардоштанд.
