12.01.26 Имрӯз Раиси Кумитаи Маҷлиси намояндагони Маҷлиси Олии Ҷумҳурии Тоҷикистон оид ба корҳои байналмилалӣ, иттиҳодияҳои ҷамъиятӣ ва иттилоот Гулзода Маҳмадшоҳ бо Сафири Фавқулода ва Мухтори Ҷумҳурии Мардумии Чин дар Ҷумҳурии Тоҷикистон муҳтарам Го Чжицзюн мулоқот намуд.
Зикр гардид, ки аз лаҳзаи барқарор гардидани муносибатҳои дипломатӣ робитаҳои дуҷонибаи кишварҳоямон дар асоси эҳтироми мутақобила, баробарӣ ва манфиати ҳамдигар рушду инкишоф ёфта истодаанд.
Дар ин давра Тоҷикистону Чин саҳифаи нави дӯстии чандинасраро боз намуда, аз имтиҳони нооромии вазъи байналмилалӣ бо сарбаландӣ гузашта, муносибатҳои худро аз ҳамсоягии нек ба шарикии стратегӣ расонидаанд. Ин муносибатҳо ба шарофати иродаи сиёсӣ ва талошҳои муштараки роҳбарони Тоҷикистон ва Чин — Пешвои миллат муҳтарам Эмомалӣ Раҳмон ва муҳтарам Си Ҷинпин — ба сатҳи баланди шарикии стратегӣ расида, барои густариши минбаъдаи ҳамкориҳои гуногунҷанба заминаи мусоид фароҳам оварданд.
Мубодилаҳо миёни мақомоти қонунгузор ҷузъи муҳимми муносибатҳои Тоҷикистону Чин ба шумор мераванд. Солҳои охир мақомоти қонунгузори ҳар ду кишвар робита ва ҳамкориҳои зич дошта, дар пешбурди муносибатҳои дуҷониба нақши муҳим бозидаанд.
Мо аз раванди мусбати ҳамкориҳои байнипарламентӣ ва густариши робитаҳои мақомоти қонунгузори ду кишвар изҳори қаноатмандӣ менамоем. Бо таъсиси Гурӯҳҳои дӯстӣ ва ҳамкорӣ байни парламентҳои ду кишвар умед дорем, ки ин гурӯҳҳо дар таҳкими ҳамдигарфаҳмӣ ва дӯстии миёни ду халқ нақши боз ҳам созандатар ва фаъолтар хоҳад бозид.
Итминон дорам, ки бо талошҳои муштараки мо муносибатҳои Тоҷикистону Чин дурнамои боз ҳам равшантар ва васеътар хоҳанд дошт,- изҳор намуд М. Гулзода.
